Жақында жарияланған зерттеу нәтижелері интернеттегі контенттің жартысынан көбінің алгоритмдер арқылы жасалған болуы мүмкін екенін көрсетті. Бұл үрдіс видео платформаларына да қатысты. Kapwing компаниясы жүргізген талдау бойынша, YouTube жаңа пайдаланушыларға ұсынатын бейнероликтердің 21 пайыздан астамы жасанды интеллект арқылы жасалған сапасы төмен контентке жатады. Мұндай материалдар әдетте көп көлемді, мазмұны әлсіз және көбіне автоматтандырылған ЖИ-қосымшалар арқылы дайындалады.
Бұл видеолардың негізгі мақсаты қаралым мен жазылушылар санын жасанды түрде көбейту немесе қоғам пікіріне, саяси көзқарастарға ықпал ету болып табылады. Зерттеушілер жаңа аккаунт ашып, Shorts бөліміндегі ұсыныстар лентасын талдаған. Алғашқы 500 бейнероликтің 104-і, яғни 21 пайызы негізінен жасанды интеллект арқылы жасалған деп анықталды. Сонымен қатар, 165 видео немесе 33 пайызы «ақпараттық қоқыс» санатына жатқызылды, бұл контенттің сапасы төмен және жасалу тәсіліне қарамастан мазмұны мәнсіз екенін көрсетеді.
Қаралым саны бойынша ЖИ арқылы жасалған контенттің көшбасшысы Оңтүстік Корея болды. Онда 11 танымал арнаның жинаған қаралымы 8,45 миллиардтан асты. Екінші орында Пәкістан (5,34 миллиард), үшінші орында АҚШ (3,39 миллиард) тұр. Ал жазылушылар саны бойынша АҚШ арналары 14,4 миллион жазылушымен үшінші орынға шықты, бірінші орында Испания (20,22 миллион), екінші орында Египет (17,9 миллион) орналасқан.
Бұл феномен тек YouTube-пен шектелмейді. Әлеуметтік желілер, жаңалық сайттары, суреттер банкі сияқты бұрын адам жасаған контент басым болған сандық кеңістік қазір алгоритмдермен толып отыр. Сол себепті төмен сапалы ЖИ-контентті сипаттайтын «слоп» термині Merriam-Webster сөздігі тарапынан жыл сөзі деп танылды.
Дереккөз – Kapwing
