21-22 тамыз күндері Қостанайда Qostanai Investment Forum 2025 өтті. Бұл аймақтық деңгейдегі ең ірі алаңдардың бірі болып, цифрлық трансформация мен жасанды интеллект саласындағы соңғы жетістіктерді көрсетуге арналды. Форумға мемлекеттік органдар, халықаралық ұйымдар, венчурлық және IT қауымдастықтары, сондай-ақ бизнес көшбасшылары мен стартаптар қатысты.
Форумның бірінші күнінде ауылдық жерлерде мобильді байланыс инфрақұрылымын кеңейтудің екінші кезеңі іске қосылды. Өткен жылғы желтоқсанда басталған бірінші кезең 15 ауылда байланыс орнатуға мүмкіндік берген болатын. Қостанай облысының әкімі Құмар Ақсақалов пен Beeline компаниясының басшылығы телеком-инфрақұрылымды одан әрі дамыту туралы меморандумға қол қойып, мемлекет пен бизнестің бірлескен жұмысының маңыздылығын атап өтті.
Qostanai Hub алаңы стартаптар мен жас кәсіпкерлерге арналған. «Pizza Pitch» форматында қатысушылар өз жобаларын инвесторларға таныстырды. Сонымен қатар Forbes журналының «30 under 30» рейтингіне енген жұлдыздармен кездесулер өңірдің инновация орталығы ретіндегі әлеуетін көрсетті. Солардың қатарында EasyTap компаниясының негізін қалаушы Мазгум Толеш және IGPS Tech стартабының бірлескен құрылтайшысы Мирас Байжігіт бар.
Форумның негізгі бағдарламасы KIA Qazaqstan зауытында өтті. Мұнда цифрлық шешімдер мен жасанды интеллект әзірлемелері көрмеге қойылды. Әкім Құмар Ақсақалов ауыл шаруашылығы, тұрғын үй-коммуналдық шаруашылық және мал шаруашылығында жасанды интеллектінің қолданылуы туралы айтып өтті. Сонымен қатар, ол агроөнеркәсіп саласында «ақылды фермалар» жобасын іске асыруды, тұрғын үй-коммуналдық шаруашылықта жылу желілерін ішкі диагностика арқылы қадағалауды және басқа да заманауи технологияларды қолдану бағыттарын атап өтті.
Форум көрсеткендей, Қостанай облысы инновациялық жобалар мен инвесторларға цифрлық экожүйе құруда белсенді жұмыс істеп келеді. Өңір қазіргі заманғы технологияларды енгізуге дайын екенін, IT-қауымдастық қалыптастыратынын және Қазақстандағы жасанды интеллект саласында көшбасшы орынға ие болуға ұмтылып отырғанын дәлелдеді.
