Қазақстанда онлайн-кредит беруге қатысты жаңа шектеулер енгізілуі мүмкін. Қаржы нарығын реттеу және дамыту агенттігі (ҚНРДА) алғаш рет несие алатын азаматтарға оны тек банк немесе микроқаржы ұйымының бөлімшесінде рәсімдеу талабын енгізуді қарастыруда.
ҚНРДА бұл өзгерісті қаржылық алаяқтықтың алдын алу мақсатында ұсынып отыр. Егер азамат бірінші рет несие рәсімдегісі келсе, оны тек банкке немесе микроқаржы ұйымының кеңсесіне жеке барып қана ала алады. Бұл шара клиенттің жеке басын анықтап, несие оның келісімімен алынғанын нақтылау үшін қажет.
Сонымен қатар, 21 жасқа толмаған және 55 жастан асқан азаматтарға онлайн-кредит беру үшін олардың қосымша келісімі қажет болуы мүмкін. Ал егер несие қашықтан рәсімделсе, ол тек несие бюросы немесе “электрондық үкімет” веб-порталы арқылы расталуы тиіс.
Бұдан бөлек, байланыс операторларына SIM-карталарды рәсімдеу кезінде биометриялық сәйкестендіруді міндеттеу ұсынылуда. Сонымен бірге, бір адамға берілетін SIM-карталардың саны шектелуі мүмкін. Бұл өзгерістер мобильді алаяқтықтың алдын алу және қаржы қауіпсіздігін күшейту мақсатында қарастырылып отыр.
Мамандардың пікірінше, бұл талаптар қаржы нарығында қауіпсіздікті арттырып, онлайн-қарыз алу кезінде алаяқтық әрекеттердің азаюына ықпал етуі мүмкін. ҚНРДА осы бастамалар бойынша нақты шешімдер қабылдаған жағдайда, жаңа ережелер заңнамалық деңгейде бекітілетін болады.
