Қайырлы күн, ардақты оқырман!
Өткен аптада технология мен цифрлық даму қоғамдық талқылаудың өзегіне айналды. Қазақстан жасанды интеллект бағытындағы қадамдарын нықтай түсіп, білім беру мен кәсіпкерлікке арналған жаңа цифрлық шешімдерді іске қосты. Әлемдік беталыс та технологияның ертеңгі бейнесін айқындап отыр. Алайда кеңейген мүмкіндіктермен қатар мұқияттылықты қажет ететін сын-қатерлер де қатар жүреді. Ендеше, соңғы жеті күнде назар аудартқан маңызды жаңалықтарға қысқаша тоқталайық.
Қазақстанда Gemini жасанды интеллект үлгісі қазақ тілінде іске қосылды
Google компаниясы әзірлеген Gemini жасанды интеллект жүйесі енді қазақ тілінде жұмыс істейді.Бұл – жай ғана тілдік бейімдеу емес, отандық пайдаланушылар үшін жаңа мүмкіндіктерге жол ашатын маңызды қадам. Қазір жүйе веб-нұсқада жұмыс істейді, алдағы уақытта мобильді қосымшалар мен тікелей сөйлесу тәртібі іске қосылмақ. Бұл бастама Қазақстанда жасанды интеллектіге негізделген дербес цифрлық ортаның қалыптасуына серпін беріп, технологияны білім мен күнделікті еңбекке жақындата түседі.
Қазақстанда цифрлық мемлекеттік стандарт енгізіледі
Технология кеңінен қолданылған сайын деректер мен үдерістерді жүйелеу қажеттілігі арта түсуде. 2026 жылдан бастап елде Ұлттық тауарлар каталогын пайдалану міндеттелмек. Бұл – әрбір өнім бірыңғай, ашық әрі нақты сипаттамамен тіркелетін ортақ цифрлық кеңістік. Мемлекет үшін бұл – бақылау мен талдау тетігі, бизнес үшін – жаңа талаптар, ал тұтынушы үшін – ақпараттың анықтығы мен қорғалу кепілі. Мұндай жүйелілік жасанды интеллект пен цифрлық платформаларды кеңінен енгізуге берік негіз қалайды.
Қазақстан Орталық Азияда ЖИ енгізуге дайын елдердің көшін бастады
Цифрландыру мен жасанды интеллектті жүйелі түрде дамыту нәтижесінде Қазақстан Government AI Readiness Index жаһандық рейтингінде бір жыл ішінде 16 сатыға жоғарылап, Орталық Азияда көшбасшы атанды. Сарапшылар мемлекеттік секторда ЖИ-дің белсенді қолданылуын, инфрақұрылымның дамуын және реттеу саясатының айқындығын атап өтуде. Деректерді біріздендіру мен цифрлық үдерістерді тәртіпке келтіру жеке бастамаларды нақты нәтижеге бағытталған тұтас жүйеге айналдырып келеді.
Техникалық және кәсіптік білім беру жүйесінде ЖИ енгізу бағдарламасы басталды
Жасанды интеллектіні тиімді пайдалану үшін тек технология емес, оны меңгере алатын мамандар қажет. Осы мақсатта Астанада техникалық және кәсіптік білім беру жүйесіне ЖИ енгізуге арналған республикалық бағдарлама іске қосылды. Бағдарлама аясында Астана, Ақмола және Қарағанды облыстарындағы колледж оқытушыларына арналған тегін біліктілікті арттыру курстары өтуде. Теория мен тәжірибе қатар ұштасқан бұл бастаманың қорытынды кезеңі – білім мен бизнеске арналған AI-жобаларға бағытталған Hackathon Battle.
Илон Маск AGI жасау мерзімін 2026 жылға шегерді
Әлемдік технологиялық қауымдастық назарын тағы да Илон Маск өзіне аударды. Ол xAI компаниясы адам санасына жақын жасанды жалпы интеллектіні 2026 жылға қарай жасау мүмкін екенін мәлімдеді. Бұған дейін бұл меже 2025 жыл деп көрсетілген еді. Сарапшылар AGI ұғымының өзі мен оның ықтимал салдарын талқылап жатқанда, Масктің батыл жоспарлары технологияның болашағына қалай әсер ететініне әлем көз тігіп отыр.
«Құпия Аяз ата» челленджі алаяқтардың құралына айналды
Жаңа жыл қарсаңындағы онлайн бастамалар да қауіпсіз бола бермейді. Әлеуметтік желілерде «Құпия Аяз ата» атты челленджді жамылған алаяқтық әрекеттер анықталды. Қатысушыларды сыйлық алмасуға шақырған қаскөйлер ақыр соңында қаржы немесе сыйлықты иемденіп кетеді. Мамандар мұндай ұсыныстарға сақтықпен қарап, кез келген онлайн бастаманы алдын ала тексеруге кеңес береді.
1414 нөмірі: неге әрдайым сақ болған жөн?
Бұл жағдай Бас прокуратура ескерткен тағы бір кең таралған алаяқтық түрімен сабақтас. 1414 нөмірінен келген SMS арқылы өзін банк не мемлекеттік орган өкілі ретінде таныстырып, кодтар мен қаржыны алдап алу әрекеттері әлі де кездеседі. Қазір мұндай жүйелерге қол жеткізу биометрия, электрондық цифрлық қолтаңба немесе eGov QR арқылы ғана мүмкін. Қорғаныс талаптарын енгізбеген сервистер ажыратылатын болады. Сарапшылар жеке деректерді бөгде адамдарға бермеуге, күмән туындаса, тікелей ресми мекемелерге жүгінуге шақырады.
Алдағы аптада осы бастамалардың қалай жүзеге асатынын, цифрлық кеңістіктегі жаңа мүмкіндіктер мен сын-қатерлердің қалай өрбитінін бірге бақылап отырамыз. Технологиялық өзгерістерден қалыс қалмай, маңызды үрдістерден хабардар болыңыз.
