Қазақстанда қаржылық процестерді жоспарлауда жасанды интеллектіні енгізу көзделуде. Қаржы министрлігі LS басылымына осы жаңа технологияның енгізілу барысы туралы мәлімет берді. Министрлік өкілдерінің айтуынша, бұл технология кезең-кезеңімен, цифрлық даму министрлігімен бірлесіп жүзеге асырылатын болады. Биылғы жылы пилоттық режимде жасанды интеллект үш жылға арналған қаржы ағындарын есептеуде қолданылады.
Қаржы министрлігінде жасанды интеллектінің маңызды рөл атқаратыны атап өтілді. Ол мемлекеттік шығындар мен кірістерді болжауға, сондай-ақ тиімсіз бағыттарды анықтап, оларды оңтайландыру жолдарын ұсынуға мүмкіндік береді. Бұл қаржы ресурстарын тиімді бөлуге және олардың жұмсалуын бақылауды арттыруға ықпал етеді. Ведомстволар мен бағдарламалар арасында қаржы бөлу нақтыланып, болашақ қажеттіліктер де есепке алынады.
Жаңа технологияны енгізудің алғашқы кезеңінде деректер жиналып, модельді қалыптастыру басталады. Бұл уақытта маусымдық өзгерістер анықталып, жасанды интеллект арқылы алынған болжамдар шектеулі мемлекеттік органдар тобында тексеріледі. Тест нәтижелері гиперпараметрлерді қайта реттеуге және қателіктерді түзетуге мүмкіндік береді. Осылайша, цифрлық ақыл үнемі жетілдіріле түседі.
Жасанды интеллектіні толық енгізу пилоттық жобаның нәтижесіне қарай бір жылдан үш жылға дейін уақыт алуы мүмкін. Сынақ кезеңі сәтті аяқталғаннан кейін, бұл технология басқа процестерде де қолданылмақ.
Министрлік өкілдері жасанды интеллект негізінде дайындалған қаржылық болжамдардың міндетті түрде сарапшылар тарапынан тексерілетінін айтты. Мамандар нейрожелінің болжамдарын қазіргі әдістермен алынған деректермен салыстырып, цифрлық жоспардың нақты экономикалық жағдайға сәйкестігін анықтайды.
Қаржы жоспарлауымен қатар, жасанды интеллект бірнеше басқа салаларда да пайдаланылмақ.
Мемлекеттік қызмет көрсету саласында азаматтар мен заңды тұлғаларға арналған чат-боттар мен онлайн кеңес беру қызметтері әзірленіп, жиі қойылатын сұрақтарға жауап беруге және әкімшілік мәселелерді жылдам шешуге көмектеседі. Бұл қызметкерлердің жүктемесін азайтады.
Сонымен қатар, жасанды интеллект заңнамалық, экономикалық және әлеуметтік өзгерістерге байланысты туындайтын қауіптерді талдау үшін қолданылатын болады.
Қаржыландыру туралы айта отырып, министрлік пилоттық жобаның электрондық қаржы орталығы арқылы жүзеге асырылатынын хабарлады. Хостингті жалға алу да қажет. Қазір коммерциялық ұсыныстар жиналуда.
