ASUS компаниясы соңғы жылдары тек жаңа құрылғыларымен ғана емес, технологиялық көзқарасымен де назар аударып келеді. Бұл жолы әңгіме өнімдер жайында ғана емес. Компанияның қалыптасу тарихы, ұстанған бағыты, алдағы даму жоспары және ROG брендінің жиырма жылдық мерейтойына арналған жаңалықтар сөз болады. Осы іс-шара барысында ASUS өз технологиялық ұстанымын, болашаққа арналған бастамаларын және мерейтойлық ROG Edition 20 топтамасын таныстырды.
ASUS компаниясының 20 жылдық мерейтойына арналған іс-шарада бренд өкілдері екі онжылдықтағы жетістіктеріне шолу жасап, алдағы даму бағытын таныстырды. Таныстырылымның өзегі ROG тарихындағы мерейтойлық кезеңді айшықтайтын Edition 20 топтамасына арналды. Бұл топтама жоғары өнімді құрылғыларды, біртұтас технологиялық экожүйені және жасанды интеллект мүмкіндіктерін ұтымды пайдалануды бір арнаға тоғыстырады.
Іс-шараны ашқан ASUS директорлар кеңесінің төрағасы Джонни Ши ROG бренді ойын құрылғылары индустриясындағы қалыптасқан шектеулерді еңсеру және бұл бағыттағы көзқарасты түбегейлі жаңарту мақсатында дүниеге келгенін атап өтті.
Жиырма жыл ішінде бренд жоғары өнімділікке ғана басымдық беріп қойған жоқ. Сонымен қатар өзіндік дизайнерлік және технологиялық ұстанымын қалыптастырып, жекелеген құрылғыларды әуесқой пайдаланушылар мен кәсіби ойыншыларға арналған тұтас экожүйеге айналдыра білді.
Компания брендтің қалыптасуы мен дамуына пайдаланушылар қауымдастығының қосқан үлесін ерекше атады. ASUS өкілдерінің айтуынша, ROG өнімдері әлемнің түкпір-түкпіріндегі оверклокерлермен, киберспортшылармен және технология әуесқойларымен тығыз байланыста жетілдіріліп келеді. Олардың ұсыныстары мен пікірлері жаңа құрылғыларды әзірлеу барысында тұрақты түрде ескерілген. Сондай-ақ компания алдағы уақытта экожүйені одан әрі кеңейтуге, салқындату және қуатпен қамтамасыз ету жүйелерін жетілдіруге, сондай-ақ жасанды интеллект мүмкіндіктерін ойын құрылғыларының жұмысына кеңінен енгізуге басымдық беретінін мәлімдеді.
Маңызды жаңалықтардың бірі ретінде ROG Lab зерттеу алаңы таныстырылды. Бұл жоба келесі буын технологияларын әзірлеуге және пайдаланушының цифрлық ортамен өзара әрекеттесу мүмкіндіктерін жаңа деңгейге көтеруге бағытталған.
Одан кейін ROG Edition 20 мерейтойлық топтамасы көпшілік назарына ұсынылды. Оның құрамына бірыңғай дизайнерлік шешіммен әзірленген, саны шектеулі құрылғылар енген. Әрбір безендіру элементі брендтің даму тарихындағы маңызды кезеңдерді бейнелейді. Қара түс ROG философиясының негізі саналатын жоғары өнімділікті білдірсе, қызыл реңктер алғашқы өнімдерді еске салады. Ал Crystal Lens сәндік элементтері мен алтын түсті әрлеу құрылғылардың премиум деңгейін және болашаққа бағдарланған көзқарасын айқындай түседі. Компанияның мәлімдеуінше, Edition 20 тек мерейтойлық безендіру емес, жиырма жылдық даму жолының көркем бейнесі саналады.
Таныстырылымның келесі бөлігінде жоғары өнімді компьютерлік жүйелерді құрастыратын пайдаланушыларға арналған техникалық шешімдер таныстырылды.
Көпшіліктің назары ROG Crosshair X870E Edition 20 аналық тақшасына ауды. Ол ROG Ryujin 360 Edition 20 сұйық салқындату жүйесімен бірге ұсынылды. Мұндай үйлесім аса жоғары жүктеме мен үдетілген жұмыс режимінде жүйенің тұрақтылығын қамтамасыз етеді. Сонымен қатар құрамдас бөліктердің жұмыс көрсеткіштерін бір ортадан бақылауға мүмкіндік беретін үлкен дисплей орнатылған.
Басты жаңалықтардың бірі — ROG Astral GeForce RTX 5090 Edition 20 бейнекартасы болды. Құрылғы телеметриялық мәліметтер мен анимациялық бейнелерді көрсетуге арналған иілген AMOLED дисплейімен жабдықталған. Экрандағы көріністер жүйенің басқа бөліктерімен үйлесімді жұмыс істеп, бейнекартаны бүкіл компьютердің негізгі көрнекі бөлігіне айналдырады.
Сондай-ақ ROG Thor 3000W Titanium III Edition 20 қуат көзі де таныстырылды. Ол бірнеше флагмандық графикалық процессоры бар аса қуатты жүйелерге есептелген және жұмыс станциялары мен өнімділігі жоғары зертханалық конфигурацияларда пайдалануға арналған.
Аппараттық шешімдердің қатарын ROG GR20 Edition 20 корпусы түйіндеді. Ашық үлгідегі модульдік құрылым компьютердің ішкі құрамдас бөліктерін барынша айқын көрсетіп, жүйені технологиялық көрме үлгісіндегі шешімге айналдырады.
Одан әрі мерейтойлық топтама дәстүрлі дербес компьютерлер шеңберінен асып түсті. Компания NVIDIA GeForce RTX 5090 Laptop GPU графикалық процессорымен және QuietFlow салқындату жүйесімен жабдықталған ықшам ROG NUC 16 Edition 20 құрылғысын, сондай-ақ саны шектеулі ROG G1000 Edition 20 үстелүсті компьютерін таныстырды. Бұл жүйе аса жоғары өнімділікке ие және заманауи флагмандық құрамдас бөліктерді пайдалануға мүмкіндік береді.
ROG экожүйесінің мүмкіндіктері құрылғыларды бір орталықтан басқаруға арналған ROG Armoury Crate Edition 20 бағдарламалық кешенімен толықтырылды. Дисплейлер мен желілік құрылғылар санатында жаңартылу жиілігі 720 Гц-ке дейін жететін Tandem WOLED панелі негізіндегі монитор және деректерді 30 Гбит/с жылдамдыққа дейін жеткізе алатын WiFi 7 стандартына сай флагмандық роутер таныстырылды.
Перифериялық құрылғылар жоғары деңгейдегі экожүйе тұжырымдамасын жалғастырды. ROG Azoth Extreme Edition 20 пернетақтасы сапасы жоғары материалдардан әзірленіп, OLED дисплеймен жабдықталған. ROG Harpe II Extreme Edition 20 тінтуірі киберспорт талаптарына сай жоғары дәлдік пен сымсыз байланыстың өте жоғары жылдамдығын қамтамасыз етуге арналған. Ал аксессуарлар топтамасы брендке тән бірізді көркемдік шешімді толықтыра түсті.
ROG Rapture GT-BE98 Pro Edition 20 тек желілік құрылғы ғана емес, ойын бөлмесінің ажырамас сәндік элементіне айналған. Қара және алтын түстер үйлесімі оның премиум санатқа жататынын айқындай түседі әрі құрылғының ойын технологияларын жоғары бағалайтын пайдаланушыларға арналғанын аңғартады. Ені 320 МГц арнаға негізделген WiFi 7 технологиясы, 4096-QAM модуляциясы және көпарналы байланыс режімі (MLO) деректерді 30 Гбит/с жылдамдыққа дейін жеткізуге мүмкіндік береді. Үш деңгейлі ойын трафигін жеделдету технологиясы мен арнайы ойын порты онлайн ойын барысында тұрақты әрі кідіріссіз қосылымды қамтамасыз етеді.
Құрылғы екі 10G және төрт 2.5G желілік портпен жабдықталған. Ақпараттық қауіпсіздікке арналған кеңейтілген мүмкіндіктер мен VPN қолдауы оны интерьердің сәнді бөлшегі ғана емес, үй желісінің сенімді өзегіне айналдырады. Соның нәтижесінде желінің әрбір құрамдас бөлігі жоғары жылдамдықты, тұрақты жұмысты және пайдаланушыға қолайлы ортаны қамтамасыз етуге қызмет етеді.
Таныстырылымның қорытынды бөлімінде ROG Destrier Edition 20 және ROG SLASH Edition 20 топтамалары көпшілік назарына ұсынылды. Бұл өнімдер брендтің өзіндік көркемдік ерекшелігін сақтай отырып, экожүйені күнделікті пайдалануға және эргономикаға негізделген шешімдермен толықтырды.
Сонымен қатар аппараттық құрылғылардан тыс әзірленген жобалар да таныстырылды. Олардың қатарында ROG OMNI Edition 20 коллекциялық мүсіншесі мен бренд әлемін офлайн кеңістікте толықтыратын ROG Saga: In Search of Lapuntu Edition 20 үстел ойыны бар.
Енді ASUS TUF өнімдер желісіне енгізілген жаңалықтарға тоқталып, оның даму бағытын қарастырайық.
ASUS TUF Gaming T700 — өнімділігі жоғары ойын үстелі компьютері. Оның өндірістік стильдегі айқын дизайны TUF Gaming сериясына тән сенімділік пен беріктік қағидаттарымен үйлесім тапқан. Шынықтырылған шыныдан жасалған алдыңғы және бүйір панельдер жүйенің ішкі құрамдас бөліктері мен баптауға болатын Aura Sync RGB жарықтандыруын толық көруге мүмкіндік береді. Көлемі 47 литр болатын корпуста қалыптасқан көркем композиция құрылғының сыртқы келбетін айрықша әсерлі етеді. Құрал-саймансыз ашылатын құрылымы техникалық қызмет көрсету мен құрамдас бөліктерді жаңартуды жеңілдетіп, инженерлік шешімнің тұтастығын сақтайды.
TUF Gaming T700 AAA санатындағы заманауи ойындар мен ресурсты көп қажет ететін шығармашылық жұмыстарды орындауға арналған. Жүйе жаңа буындағы Intel немесе AMD процессорларына, NVIDIA GeForce RTX графикалық жүйесіне, жоғары жылдамдықты DDR5 жедел жадына және өнімділігі жоғары жинақтауыштарға негізделген.
Мұндай техникалық шешімдер әртүрлі пайдалану жағдайында тұрақты әрі жоғары өнімді жұмыс істеуге мүмкіндік береді. Төрт желдеткіштен тұратын салқындату жүйесі және өлшемі 240 мм-ге дейінгі сұйық салқындату жүйесін қолдау ұзақ уақыт бойы жоғары жүктеме түскен кезде де оңтайлы температураны сақтап, жүйенің тұрақты жұмысын және шу деңгейінің төмен болуын қамтамасыз етеді.
Платформаның сенімділігі MIL-STD-810H стандарты талаптарына сәйкес жүргізілген сынақтармен расталған. Құрылғының USB порттарының мол болуы және жоғары жылдамдықты USB-C® интерфейсінің болуы түрлі перифериялық құрылғыларды еркін қосуға әрі жұмыс үдерісін икемді ұйымдастыруға мүмкіндік береді. Кеңейтуге қолайлы архитектурасының арқасында TUF Gaming T700 заманауи ойындар мен жасанды интеллектке негізделген есептеу міндеттеріне бейімделген әмбебап әрі ұзақ мерзімге арналған платформа ретінде ерекшеленеді.
TUF GAMING Z890-BTF WIFI7 аналық тақтасы TUF Gaming сериясына тән сенімділікті қазіргі заманғы есептеу міндеттеріне, соның ішінде жасанды интеллект қолданылатын сценарийлерге қажетті жоғары өнімділікпен ұштастырады. Бұл модель кеңістігі шектеулі ықшам жүйелік блоктарға арналып әзірленген және тұрақтылықты, тиімділікті әрі функционалдық мүмкіндіктерді қамтамасыз етеді. Intel компаниясының соңғы буын процессорларын қолдайтын плата серверлік деңгейдегі 10 қабатты баспа тақшасы негізінде жасалған. Мұндай құрылым қоректендіру жүйесінің тұрақты жұмысын қамтамасыз етіп, ойындарда және жасанды интеллектке тән жоғары жүктемелер кезінде өнімділіктің бірқалыпты сақталуына мүмкіндік береді.
Mini-ITX пішіміне қарамастан, аналық тақта PCIe 5.0 M.2 және PCIe 4.0 M.2 интерфейстерін, сондай-ақ Wi-Fi 7 мен 2.5G Ethernet технологияларын қолдайды. Соның нәтижесінде деректерді жоғары жылдамдықпен әрі тұрақты тасымалдауға жағдай жасалған. AI Cache Boost, AI Cooling II, AEMP және ASUS AI Advisor технологиялары жүйені баптауды жеңілдетіп, оның жұмысын нақты уақыт режимінде оңтайландырады. Ал BIOS FlashBack™, Q-LED және Q-Antenna шешімдері компьютерді құрастыру мен бастапқы күйге келтіру үдерісін барынша қарапайым әрі ыңғайлы етеді.
TUF GAMING B850I WIFI NEO сенімді өнімділікті, ықшам әрі үйлесімді дизайнды және жан-жақты ойластырылған инженерлік шешімдерді бір арнаға тоғыстырып, Mini-ITX пішіміндегі ықшам платформа ұсынады. Ол жүйенің тұрақтылығы мен икемділігіне басымдық беретін ойыншыларға және жоғары өнімді есептеулермен, соның ішінде жасанды интеллектке негізделген жүктемелермен жұмыс істейтін пайдаланушыларға арналған. DrMOS негізіндегі 14(80A)+2(80A)+1(80A) қоректендіру жүйесі тұрақты жұмысты қамтамасыз етеді, ал AEMP технологиясы DDR5 жедел жадының мүмкіндіктерін толық пайдалануға мүмкіндік бере отырып, үйлесімділікті сақтайды.
Ықшам пішіміне қарамастан, аналық тақта графикалық жүйеге арналған PCIe 5.0 интерфейсін және үш M.2 слотын ұсынады. Олардың бірі құралсыз-ақ тез шешіп алуға мүмкіндік беретін M.2 Q-Release механизмімен жабдықталған. Сонымен қатар платформа ASUS Q-Antenna технологиясы бар Wi-Fi 7, USB Type-C интерфейсі және көлемі 64 МБ BIOS микробағдарламасымен толықтырылған. Бұл шешімдер жүйені ұзақ уақыт бойы қолдауға және оны кейінгі жаңғыртуға қолайлы жағдай жасайды.
TUF GAMING B850 PRO WIFI7 NEO ATX өнімділік деңгейін одан әрі арттырып, жүйені жан-жақты баптау мүмкіндігін ұсынады. Платформа SPS 16(80A)+2(80A)+1(80A) қоректендіру жүйесіне негізделген және Dynamic OC Switcher, Core Flex пен ASUS компаниясының асинхронды тактілік генераторы сияқты технологиялармен толықтырылған. Бұл шешімдер әртүрлі жұмыс жүктемесіне сәйкес өнімділік параметрлерін дәл реттеуге мүмкіндік береді. DDR5 жедел жадының мүмкіндіктері AEMP, DIMM Fit Pro және NitroPath DRAM технологиялары арқылы кеңейтілген. Ал PCIe 5.0 x16 SafeSlot және бірнеше M.2 ұяшығы жоғары өткізу қабілетін қамтамасыз етеді. Желіге қосылу мүмкіндіктері Wi-Fi 7 және 5G Ethernet технологияларымен толықтырылған. Бұған қоса, PCIe мен M.2 модульдерін жылдам шешіп алуға арналған инженерлік шешімдер жүйені жаңғырту үдерісін едәуір жеңілдетеді. Көлемі 64 МБ BIOS микробағдарламасы жүйені ұзақ мерзім бойы қолдауға және оның баптау мүмкіндіктерін кеңейтуге жағдай жасайды.
ASUS XG Core экожүйенің мүмкіндіктерін аналық тақталар аясынан тыс кеңейтіп, ықшам құрылғыда сыртқы графикалық есептеу қуатын ұсынады. AMD Radeon™ RX 9060 XT LP графикалық процессорымен және 16 ГБ бейнежадымен жабдықталған құрылғы үшөлшемді графикамен, мультимедиалық контент әзірлеумен және жасанды интеллектке негізделген есептеу міндеттерімен тиімді жұмыс істеуге арналған. USB4® интерфейсі құрылғыны оңай қосуға мүмкіндік берсе, HDMI® мен DisplayPort сыртқы мониторларды жалғауды қамтамасыз етеді. Осылайша, құрылғы сыртқы графикалық үдеткіш пен док-станцияның мүмкіндіктерін бір жүйеге біріктіріп, үстел үсті компьютеріне тән өнімділікті мобильді форматта пайдалануға жол ашады.
ASUS компаниясының PR жөніндегі директоры Влад Захаровпен сұхбаттасып, ROG брендінің даму ұстанымдары туралы жан-жақты әңгімелестік. Іс-шара барысында ол ақпараттық бағыт-бағдар беріп, брендтің қалыптасуы мен даму кезеңдеріне қатысты маңызды мәліметтермен бөлісті. Біз үшін күнделікті өміріміздің ажырамас бөлігіне айналған әрі пайдаланушылардың сұранысына жауап беретін құрылғылардың қандай қағидаттарға сүйеніп әзірленетінін тікелей әзірлеуші тараптың өкілінен білу маңызды болды. Сұхбат барысында берілген жауаптар аңызға айналған құрылғыларды жасаушылардың ұстанатын негізгі қағидаттарын, сондай-ақ олардың өз ісіне деген кәсіби ынтасы технологиялық индустрияның дамуына ықпал ететін жоғары деңгейлі өнімдердің дүниеге келуіне қалай негіз болатынын тереңірек түсінуге мүмкіндік берді. Оқырман үшін бренд тарихындағы ең маңызды кезеңдермен танысу да қызықты болары сөзсіз.
ROG Республикасының тұжырымдамасы осы жиырма жыл ішінде неліктен түбегейлі өзгерді?
Барлығы 2006 жылы инженерлеріміздің тек жоғары өнімді техникалық шешім әзірлеумен шектелмей, ортақ қызығушылыққа ие пайдаланушылар қауымдастығын қалыптастыруды мақсат еткен өршіл бастамасынан басталды. Осыдан жиырма жыл бұрын ROG бренді кәсіби деңгейде ойын ойнайтын пайдаланушыларға, киберспортшыларға және технологияға ерекше қызығушылық танытатын аудиторияға арналған мамандандырылған бағыт ретінде қалыптасты. Біз нақты бір пайдаланушылар тобының қажеттілігін ескеріп, солардың талабына сай өнімдер әзірледік әрі олармен ортақ кәсіби тілде сөйлестік.
Осы жиырма жыл ішінде технологиялық индустрия түбегейлі өзгеріске ұшырады. Бір жағынан, гейминг әлемдік ауқымдағы мәдени әрі экономикалық құбылысқа айналып, бүгінде киберспортшылар мыңдаған көрермен жиналатын ареналарда өнер көрсетсе, стримерлер қоғамдық пікірге ықпал ететін тұлғалар деңгейіне көтерілді. Екінші жағынан, жоғары есептеу қуатына деген сұраныс бұрынғыдан әлдеқайда кеңейді. Бұрын тек ойыншылар үшін маңызды саналған жоғары өнімділік бүгінде контент жасаушыларға, күрделі графикамен, фотосуретпен және бейнематериалдармен жұмыс істейтін мамандарға, сондай-ақ нейрожелілерді қолдану мен оқыту үдерістеріне де аса қажет.
ROG осы өзгерістермен бірге дамып, ауқымды технологиялық экожүйеге айналды. Сонымен қатар брендтің негізінде жатқан инженерлік ұстанымдар өзгерген жоқ, тек олар әлдеқайда кең аудиторияның қажеттілігіне бейімделді.
Әлемдік өнімділік сынақтарында рекордтық нәтижеге қол жеткізуге арналған аппараттық шешімдерді әзірлеуде қалыптасқан инженерлік тәжірибе бүгінде ноутбуктеріміздің, перифериялық құрылғыларымыздың және портативті ойын консольдерінің сәулеттік негізіне айналды.
Бүгінде ROG түсінігіндегі технология жанашыры тек компьютерді өз қолымен құрастыратын пайдаланушы ғана емес. Бұл – күрделі үшөлшемді графикамен жұмыс істейтін маман, нейрожелілерді оқытатын әзірлеуші немесе халықаралық деңгейдегі жарыстарға қатысатын киберспортшы. ROG Республикасының негізгі тұжырымдамасы өзгерген жоқ. Ол өз құрылғысынан ең жоғары өнімділікті талап ететін пайдаланушыларға арналған ымырасыз технологиялық шешімдерге негізделген. Біздің аудиториямыз кеңейді, алайда өнімділікке қойылатын талаптарымыз бен сапа өлшемдеріміз сол күйінде сақталды.
ROG брендінің болмысын қалай сипаттар едіңіз? Пайдаланушыларды дәл осы құрылғыларды таңдауға және брендке ұзақ жылдар бойы адал болуға жетелейтін ерекшелік неде?
ROG брендіне тән басты қасиет – мінсіздікке деген мүлтіксіз ұмтылыс. Технология саласында қалыптасқан маңызды қағиданың бірі – табысты өнім жасау үшін оны пайдаланатын аудиторияның сұранысын, әдетін және қажеттілігін терең түсіну. Біз ешқашан нарықтағы белгілі бір үлесті иелену үшін баршаға ортақ, жалпылама өнім шығаруды мақсат еткен емеспіз. Керісінше, брендіміздің болмысын әр ісінде жоғары нәтижеге ұмтылатын, өзіне де, қолданатын техникасына да үлкен талап қоятын пайдаланушылар қалыптастырады.
ROG-тің басты ерекшелігі техникалық сипаттамалар тізімінен ғана көрінбейді. Бүгінде жоғары өнімді процессорды көптеген өндіруші ұсына алады. Алайда құрылғының шынайы құндылығы оны күнделікті пайдалану барысында сезіледі. Бұған сыртқы келбетінің үйлесімділігі, корпуста қолданылған сапалы материалдар, пайдаланушыға ыңғайлы етіп ойластырылған құрылымы, сондай-ақ ноутбук қақпағының ашылуынан бастап дизайндағы ең ұсақ бөлшекке дейін мұқият зерделенген шешімдер жатады.
Пайдаланушылардың ROG брендіне ұзақ жылдар бойы адал болуының сыры да осында. Біз тек жоғары өнімді техниканы ғана емес, тұтас премиум деңгейдегі пайдалану тәжірибесін және сенімділікті ұсынамыз. Әрбір бөлшектің жан-жақты ойластырылғанына деген толық сенім пайдаланушыға кез келген жағдайда еркін жұмыс істеуге мүмкіндік береді. Құрылғы қызу ойын барысында да, маңызды таныстырылым кезінде де, күрделі шығармашылық жобаларды әзірлеу кезінде де өз мүмкіндігін толық көрсетеді. Осындай ұстаным мен сапаға деген адалдық қолданушылардың сенімін қалыптастырып, брендке деген берік ықыласын нығайтады.
Тағы бір маңызды ерекшелікке тоқталған жөн. ROG өз аудиториясымен бірге дамып, бірге өседі. Біз белгілі бір өнімді ғана емес, пайдаланушының өмір салтын түсінетін және оның қажеттілігімен қатар өзгеріп отыратын тұтас экожүйені қалыптастырамыз. Брендтің қолданушымен бірге дамып келе жатқанын сезіну адамдарды балама іздеуден гөрі, ROG-ті өз ортасына сеніммен ұсынуға және келесі таңдауда да осы брендке қайта оралуға жетелейді.
Жасанды интеллект ROG құрылғыларының келешегінде қандай орын алады? Ол шекті өнімділікке қол жеткізудің негізгі құралына айнала ма, әлде пайдаланушыға бұрын-соңды болмаған жайлылық ұсынатын технология бола ма?
Жасанды интеллектке қатысты өнімділік пен пайдалану қолайлылығын бір-біріне қарсы қою дұрыс емес деп есептеймін. Біздің көзқарасымыз бойынша, бұл екеуі өзара тығыз байланыста дамитын, бірін-бірі толықтыратын ұғымдар.
Қазіргі уақытта есептеу технологиялары түбегейлі өзгерістер кезеңін бастан өткеріп жатыр. Бұрын құрылғылардың өнімділігі негізінен процессорлардың дәстүрлі сәулеті мен салқындату жүйелерінің мүмкіндігіне тәуелді болса, бүгінде бұл қағидаттар өзгерді. Қазіргі архитектура бұрынғыдан әлдеқайда ықшам әрі зияткерлік сипатқа ие болды. Нейрондық алгоритмдер нақты уақыт режимінде үздіксіз жұмыс істеп, ойын көрінісінің ерекшелігіне қарай орталық процессор мен графикалық процессор арасындағы жүктемені өздігінен үйлестіреді, кадрларды оңтайландырады және энергия тұтынуын тиімді басқарады.
Соның нәтижесінде жасанды интеллект аппараттық бөліктің табиғи шектеулеріне тірелмей-ақ құрылғының есептеу мүмкіндігін барынша тиімді пайдалануға жол ашады.
Пайдалану қолайлылығы да осы үдерістің заңды нәтижесі болып саналады. Жүйе орындалып жатқан барлық процесті жоғары дәлдікпен және өте қысқа уақытта талдайтындықтан, пайдаланушының көптеген параметрді қолмен реттеу қажеттілігі біртіндеп жойылады.
Сондықтан біздің құрылғылардағы жасанды интеллектінің негізгі міндеті – адам мен технологияның өзара ықпалдасуын табиғи әрі кедергісіз ету. Басты мақсатымыз – пайдаланушы ноутбугін ашқан сәттен бастап бар назарын өз жұмысына ғана аударуы. Күрделі визуализациямен айналыссын немесе киберспорттық жарысқа қатыссын, құрылғы барлық техникалық параметрді өздігінен оңтайландырып, нақты міндетке барынша қолайлы жұмыс ортасын қамтамасыз етеді.
ROG брендінің болашағын үш сөзбен сипаттау қажет болса, қандай сөздерді таңдар едіңіз? Алдағы 10–20 жылда бұл брендті қандай деңгейден көресіз?
Қысқаша айтқанда, бұл — біртұтас технологиялық орта, икемділік және ымырасыз ұстаным. Біртұтас технологиялық орта дейтініміз, біз әлдеқашан жеке ноутбук немесе тінтуір аясында ғана ойлаудан арылдық. Бүгінде өзара үйлесімді жұмыс істейтін, пайдаланушыға тұтас тәжірибе ұсынатын орта қалыптастырып келеміз.
Икемділік ұғымы технологиялардың пайдаланушының өмір салты мен нақты қажеттіліктеріне барған сайын дәл бейімделе түсетінін білдіреді. Бұл әсіресе жасанды интеллектіні дамыту мәселесін сөз еткенде айқын байқалады. Ал ымырасыз ұстаным – біздің басты қағидамыз. Нарықтағы үрдістер қалай өзгерсе де, осы құндылықтан ешқашан бас тартпаймыз.
Алдағы 10–20 жылға көз жүгіртсек, құрылғылардың нақты қандай сипатқа ие болатынын болжау оңай емес. Себебі бұл сала өте қарқынды дамып келеді. Қазіргі бізге үйреншікті экрандар мен пернетақталардың орнын мүлде жаңа шешімдер басуы, ал есептеу технологиялары күнделікті өмірге бүгінгіден өзгеше түрде енуі әбден мүмкін.
Дегенмен ROG үшін ең маңыздысы – құрылғының сыртқы пішіні емес, оның қандай міндетті орындайтыны. Жиырма жылдан кейін де біз бүгінгідей технологиялық дамудың алдыңғы шебінде болуға ұмтыламыз. Болашақ құрылғылары қандай сипатта болса да, біздің миссиямыз өзгермейді. Киберспортшыларға, инженерлерге, креаторларға немесе жоғары буын басшыларына өз кәсібі мен шығармашылығында ең жоғары нәтижеге қол жеткізуге мүмкіндік беретін озық технологиялық шешімдерді ұсынуды жалғастырамыз. Яғни саланың даму бағыты қандай болса да, біз премиум санатындағы ең үздік технологиялық шешімдерді әзірлеуді жалғастыра береміз.
ROG Edition 20 мерейтойлық таныстырылымының қорытындысы брендтің дамуында жаңа кезең басталғанын көрсетті. Ендігі жерде негізгі басымдық жекелеген құрылғыларға емес, біртұтас технологиялық орта қалыптастыруға беріліп отыр. ASUS 20 жылдық мерейтой аясында өнімдердің кезекті топтамасын ғана ұсынған жоқ. Компания аппараттық құрамдас бөліктер, бағдарламалық қамтамасыз ету, дизайн және пайдаланушы тәжірибесі өзара үйлесім тауып, біртұтас жүйе ретінде жұмыс істейтін тұтас технологиялық орта қалыптастыруды мақсат етіп отыр.
Көрсетілген жаңа өнімдер қатарында ROG Crosshair X870E Edition 20 аналық тақшасы мен ROG Astral GeForce RTX 5090 Edition 20 бейнекартасы секілді жоғары өнімді құрылғылардан бастап, ықшам компьютерлер, перифериялық құрылғылар, желілік шешімдер және күнделікті пайдалануға арналған түрлі аксессуарлар қамтылды. Олардың барлығы брендтің бірыңғай көркемдік және инженерлік тұжырымдамасын айқын көрсетеді. Ұсынылған құрылғылардың бәріне ортақ сипат ретінде жоғары өнімділікке басымдық берілуі, дисплейлер мен жүйелік бақылау мүмкіндіктерінің өзара үйлесімді жұмыс істеуі, сондай-ақ дербес компьютерді тек жұмыс құралы емес, өмір салты мен кәсіби қызметтің ажырамас бөлігі ретінде қабылдайтын пайдаланушылардың сұранысына бейімделуі ерекшеленеді.
Таныстырылым барысында классикалық аппараттық шешімдерден тыс бағыттардың дамуына да ерекше назар аударылды. ROG Armoury Crate Edition 20 бағдарламалық кешені, ROG Lab бастамасы және ROG Saga үстел ойыны тәрізді жобалар брендтің технологиялармен өзара әрекеттесу аясын кеңейтуге ұмтылысын көрсетеді. Бұл бастамалар пайдаланушылар үшін тек құрылғылар жиынтығын ғана емес, ортақ құндылықтар мен тәжірибеге негізделген тұтас технологиялық мәдениетті қалыптастыруға бағытталған.
Іс-шара барысында ASUS компаниясының өкілі Влад Захаровпен өткізілген сұхбат таныстырылған өнімдерден гөрі брендтің даму ұстанымына тереңірек үңілуге мүмкіндік берді. Оның айтуынша, жиырма жыл ішінде ROG әуесқой пайдаланушыларға арналған тар мамандандырылған брендтен әлемдік деңгейдегі ауқымды технологиялық ортаға айналды. Бүгінде оның өнімдері ойыншылармен ғана шектелмей, контент жасаушылардың, бағдарламашылардың және жоғары есептеу қуатын қажет ететін салаларда еңбек ететін мамандардың да қажеттілігін өтейді. Соған қарамастан, брендтің инженерлік қағидаттары мен ең жоғары өнімділікке ұмтылысы өзгеріссіз сақталған.
Сұхбат барысында ROG философиясының өзегін құрайтын негізгі ұстанымдардың бірі ретінде кемелдікке ұмтылу ерекше аталды. Бұл қағида құрылғылардың техникалық мүмкіндіктерімен ғана шектелмейді. Ол қолданылатын материалдардың сапасынан, эргономикалық шешімдерден бастап, кез келген жағдайда сенімді жұмыс істеуіне дейінгі тұтас пайдаланушылық тәжірибені қамтиды. Влад Захаровтың пікірінше, дәл осындай кешенді көзқарас пайдаланушылардың брендке деген ұзақ мерзімді сенімін қалыптастырады.
Сонымен қатар жасанды интеллектінің атқаратын рөліне де кеңінен тоқталды. ROG құрылғыларында жасанды интеллект есептеу қуатын арттырудың қосымша құралы ғана емес, пайдаланушы мен жүйенің өзара байланысын қамтамасыз ететін маңызды тетік ретінде қарастырылады. Ол нақты уақыт режимінде жүйелік ресурстарды тиімді бөліп, өнімділік пен энергия тұтынуды оңтайландырады. Соның нәтижесінде пайдаланушының қолмен баптау қажеттілігі азайып, құрылғымен жұмыс істеу әлдеқайда ыңғайлы әрі табиғи сипат алады.
Брендтің алдағы даму бағытын қорытындылай келе, Влад Захаров үш негізгі басымдықты атады. Олар — тұтас технологиялық орта қалыптастыру, өзгермелі жағдайларға бейімделу және сапа мен өнімділікке қатысты ымырасыз ұстаным. Оның пікірінше, дәл осы қағидаттар ROG бренді дамуының қазіргі бағытын айқындап қана қоймай, құрылғылардың пішімі мен технологиялық индустрия қалай өзгерсе де, алдағы жылдардағы негізгі бағдар болып қала береді.
Осылайша, мерейтойлық таныстырылым құрылғылар қатарының кезекті жаңартылуын ғана емес, ROG брендінің инновациялар, дизайн және инженерлік ұстанымдар өзара сабақтасқан кешенді технологиялық платформа ретінде орныға түскенін көрсетті.
Айта кету керек, мерейтойлық таныстырылымнан кейін ROG-ті тек жекелеген құрылғылардың жиынтығы немесе дәстүрлі түсініктегі технологиялық орта ретінде қабылдау қиын.
Бүгінде ASUS пен ROG жекелеген өнімдерді ғана ұсынумен шектелмей, технологиялар адамның күнделікті өмірімен табиғи астасатын өзіндік орта қалыптастырып келеді. Бұл орта көзге бірден байқала бермегенімен, пайдаланушы тәжірибесінің барлық кезеңінде тұрақты түрде сезіледі. Сонымен қатар таныстырылымның көркемдік шешімдері мен күрделі инженерлік тәсілдері қаншалықты ауқымды болғанымен, оның басты идеясы айқын сақталған.
Бұл жекелеген жетістіктердің көрмесі емес, жүйелі түрде жүзеге асырылып келе жатқан ұзақ мерзімді даму бағытының заңды жалғасы. Әрбір жаңа буын құрылғылары алдыңғы үлгілерді алмастырмайды, керісінше олардың мүмкіндіктерін бірізді түрде толықтыра түседі.
Мерейтойлық іс-шараның басты ерекшелігі де осында. Құрылғылардың технологиялық деңгейі мен күрделілігі артқан сайын, олар пайдаланушының күнделікті өміріне барынша табиғи кіріге түсуде. Соның нәтижесінде құрылғылар адамның назарын өзіне аударуды емес, керісінше оның уақытын үнемдеп, негізгі міндеттерге ден қоюына мүмкіндік беретін сенімді құралға айналып келеді.
