QazCode IT-компаниясы қазақ тіліндегі KazLLM үлкен тілдік моделін әзірлегені үшін AmCham Awards 2026 сыйлығының «Қазақ мәдениеті» аталымында жеңімпаз атанды. Марапат қазақ тілін сақтауға және оны заманауи цифрлық ортаға енгізуге қосқан үлесі, сондай-ақ ұлттық мүддеге сай жасанды интеллект технологияларын дамытудағы жетістіктері үшін берілді.
KazLLM жобасы 2024 жылы Назарбаев Университетінің Ақылды жүйелер және жасанды интеллект институтымен (ISSAI) бірлесіп іске қосылды. Нейрондық желі 150 миллиардтан астам токеннен тұратын көптілді деректер жиынтығы негізінде оқытылған. Модель қазақ, орыс, ағылшын және түрік тілдерін қолдайды. Оны Қазақстан аумағындағы жергілікті есептеу қуаттарында іске қосу ақпараттық қауіпсіздіктің ұлттық стандарттары мен жеке деректерді өңдеуге қойылатын талаптарды сақтауға мүмкіндік берді.
KazLLM негізінде білім беру, корпоративтік сектор және денсаулық сақтау салаларына арналған бірқатар өнім әзірленді. Олардың қатарында AI Tutor, Mentra, Aventa сервистері мен AIDA медициналық көмекшісі бар. Жобаның технологиялық негізі коммерциялық емес зерттеулерде пайдалану үшін Hugging Face платформасында ашық қолжетімді. Сонымен қатар қазақстандық инженерлер Өзбекстан, Бангладеш, Пәкістан және Украина мамандарына ұлттық тілдік модельдерді әзірлеу кезінде кеңес беріп, өз тәжірибесімен бөліскен. Қазір модель мемлекеттік органдардың қарамағына беріліп, оны қосымша деректермен оқыту жұмыстары тұрақты түрде жалғасып келеді.
Қосымша материалдар мен сараптамалық шолуларды біздің Telegram арнамыздан оқуға болады.
