Алаяқтар өздерін Мемлекеттік кірістер комитетінің қызметкерлері ретінде таныстырып, Қазақстан азаматтарына қызмет түрін растау деген желеумен қоңырау шалуды жиілеткен. Бұл туралы Мемлекеттік кірістер комитетінің баспасөз қызметі хабарлады.
Ведомствоның ресми Telegram-арнасында таратылған мәліметке сәйкес, белгісіз тұлғалар салық төлеушілерге телефон соғып, өздерін мемлекеттік орган өкілі ретінде таныстырады. Әңгіме барысында олар қызмет түрін шұғыл растау, тіркеу деректерін жаңарту немесе мобильді қосымша арқылы міндетті тексеруден өту қажеттігін алға тартады.
Осылайша олар азаматтарды бөгде қосымшаларды жүктеуге, жіберілген сілтемелерге өтуге, авторизациядан өтуге, сондай-ақ SMS-кодтарды, электрондық цифрлық қолтаңба деректерін және өзге де жеке мәліметтерді беруге итермелейді.
Мемлекеттік кірістер комитетінің дерегінше, кең таралған алаяқтық тәсілдердің бірі — «e-Salyq» қосымшасын орнатуды немесе «әр екі жыл сайын қызмет түрін растау» қажет деген сылтаумен түрлі сервистерді жүктеуді талап ететін қоңыраулар. Мұндай жағдайда алаяқтар тіпті қызметтің тоқтатылуы мүмкін екенін айтып, психологиялық қысым көрсетуге тырысады.
Ведомство бұл ақпараттың шындыққа сәйкес келмейтінін және оның алаяқтық әрекеттердің айқын көрінісі екенін атап өтті.
Мемлекеттік кірістер комитеті мамандары телефон арқылы ешқандай қосымша орнатуды, растау кодтарын, банк деректерін, құпиясөздерді немесе электрондық цифрлық қолтаңба кілттерін беруді талап етпейтінін ескертті.
Қазақстандықтарға мұқият болып, кез келген ақпаратты тек Мемлекеттік кірістер комитетінің ресми дереккөздері арқылы ғана тексеру ұсынылады.
Қосымша материалдар мен сараптамалық мақалаларды MobiLaser Telegram арнасынан оқуға болады.
