Yōtei елесі – әлемге кеңінен танылған самурайлық экшеннің жалғасы. Бұл туындыны әзірлеген Sucker Punch студиясы «Ghost» әлемін толыққанды франшизаға айналдыруды мақсат тұтып отыр.
Ghost of Yōtei ойынының оқиғасы Ghost of Tsushima желісінің жалғасы емес. Оқиға 1603 жылы, яғни Дзин Сакай өмір сүрген кезеңнен үш ғасыр өткен соң өрбиді. Соған қарамастан, екі туындыны да біріктіретін ортақ белгілер бар: студияның дара қолтаңбасы, ұқсас ойын тәсілдері және феодалдық Жапонияның мәдениеті мен тарихын терең бейнелеуі. Егер 2020 жылы шыққан Ghost of Tsushima ойынында ойыншылар Цусима аралын еркін зерттесе, жаңа бөлімде оқиға Эдзо өңірінде (қазіргі Хоккайдо) өтеді. Бұл жолы басты сахнаға табиғаты көркем Йотэй жанартауы шығады.
Sucker Punch жаңа жобасын бейнелеу сапасы, әсерлі тарихы, жекпе-жек жүйесінің икемділігі, бейнелеу шешімдері мен кейіпкерлер ойыны үшін жоғары бағалауда. Ашық әлем құрылымы ойыншыларды зерттеуге ынталандырып, әрбір табысты қадамды марапаттауға бағытталған.
Оқиға «Ацу» есімді қыздың тағдырына негізделген. Ол он алты жылдан кейін туған жеріне қайта оралып, кек алу жолына түседі. Мақсаты – «Алты қуғыншының» әрқайсысын жазалау. Бұл топты бұрын самурай болған, ал қазір өзін Солтүстіктің сёгуны деп жариялаған Сайто мырза басқарады. Бір кездері дәл осы адамдар Ацуның отбасын аяусыз қырып, үйін өртеп, қызды катанамен ағашқа шегелеп кеткен. Аңыз деректерінде сол күні Ацуның өмірі үзілді делінген. Алайда сол сәттен бастап ашу мен кекке толы Онрё – өшпенді рухтың пайда болғаны туралы аңыз тараған.
Жаңа бөлімде студия техникалық және көркемдік тұрғыдан айтарлықтай жаңартулар енгізген. Енді ойын кеңістігі бұрынғыдан да ауқымды болып, алыстағы таулар мен табиғат көріністері нақты әрі әсерлі бейнеленеді. Мұндай көріністер тесселяция жүйесін жетілдіру мен алыстағы нысандардың бөлшектік дәлдігін арттырудың нәтижесінде жүзеге асқан. Сондай-ақ, көлемді тұман мен төмен бұлттар қосылып, кейіпкерлердің тері және шаш құрылымдары жаңаша бейнелеу тәсілдерімен өңделген. Ghost of Yōtei фотореалистік бағытқа ұмтылудан гөрі, алғашқы бөлімде қалыптасқан көркемдік үйлесімділікті сақтауға басымдық береді.
Графикалық тұрғыдан байқалатын ұсақ олқылықтар ойынның әсерін төмендетпейді, өйткені басты назар табиғаттың көркем келбеті мен ойын кеңістігінің тұтастығына аударылған. Ghost of Yōtei-дің ерекшелігі де осында , яғни жапон жерінің сұлулығы мен көркем шешімдерді үйлесімді қолдануға бағытталған. Кейбір көріністерде Хоккайдоның шынайы табиғаты сәл өңделіп, эстетикалық реңк берілген, ал кей тұста авторлар өз қиялын қосқан. Ең басты жетістік – ойынның көркемдік тұтастығы мен аутенттілікті сақтай отырып, ойыншыны өз әлеміне толықтай еліктіре білуінде.
Ойын интерфейсі барынша ықшамдалған. Экранда бағыттаушы белгілер азайып, ойын әлеміне толық енуге мүмкіндік берілген. Ал ойыншының басты көмекшісі – жел. DualSense құрылғысының сенсорлы панелін сырғытқанда жел таңдалған бағытқа қарай соғады, сол арқылы ойыншы межелі нүктені таба алады.
Дегенмен жаңа жүйеде пікірталас тудыратын тұстар да жоқ емес. Бұрынғы бөлімде басты кейіпкер Дзин тек бір қылышпен шайқасқан болса, бұл жолы Ацу түрлі қару түрлерін, соның ішінде қос катана, шынжыр мен найзаны еркін қолдана алады. Мұндай көптүрлілік кей сәттерде шайқас барысын күрделендіріп, ойын ырғағын бұзуы ықтимал. Бұған қоса, жиі пайда болатын көмекші нұсқаулар ойынның табиғи ағысын тежейді. Дегенмен тарихи кезеңнің ерекшелігіне сай бұл бөлімде от қарулары да енгізілген. Олардың қолданылуы шектеулі болса да, сауытты бұзуда және қарсыласты әлсіретуде тиімді құралға айналған.
Ghost of Yōtei – Sony студиясының ерекше жобалар жасаудағы шеберлігін тағы бір рет дәлелдеген айрықша туынды. «Цусиманың елесін» ұнатқан ойыншылар үшін бұл жаңа шығарылымды байқап көрудің өзі бір қызық тәжірибе болмақ.
