Технологиялық сингулярлық мәселесі қайтадан қызу талқыланып жатыр. Tesla мен SpaceX негізін қалаушы Илон Маск адамзат осы кезеңге қазірдің өзінде кіргенін мәлімдеді. Оның сөзінше, 2026 жыл – «сингулярлық жылы», яғни жасанды интеллект адам мүмкіндіктерін айтарлықтай басып озатын кезең басталады. Бұл болжам көптеген сарапшылардың сақтық танытқан пікірінен өзгеше. Көпшілігі мұндай серпілісті тек 2045 жылға қарай күтеді.
Масктың мәлімдемесі Midjourney негізін қалаушы Дэвид Хольц жариялаған есептерге байланысты айтылды. Ол қазіргі жасанды интеллект модельдері оған соңғы он жылдағыдан әлдеқайда көп жеке бағдарламалық жобаларды қысқа мерзімде жүзеге асыруға мүмкіндік бергенін жазды. Осы хабарламадан кейін Маск X әлеуметтік желісінде: «Біз сингулярлыққа аяқ бастыдық. 2026 жыл – сингулярлық жылы» деп жауап берді.
Технологиялық сингулярлық түсінігі алғаш рет футуролог Рэй Курцвейлдің 2005 жылы жарық көрген «Сингулярлық жақындады: адамзат биологияны қалай басып озады» кітабында кеңінен танылды. Бұл ұғым жасанды интеллект адам ақылынан асып, технологиялық және әлеуметтік өзгерістерді жылдам тудырып, олардың салдарын алдын ала болжап болмау мүмкіндігіне ие кезеңді білдіреді.
Дегенмен, Курцвейл бұл процестің баяу болатынын айтады. Оның болжамы бойынша, жалпы жасанды интеллект 2029 жылы пайда болуы мүмкін, ал толық сингулярлық 2045 жылдан бұрын жүзеге аспайды. Сол кезде биологиялық емес интеллект адам ақылынан миллиард есе күшті болады.
Масктың сөзі интернет қолданушылары арасында қызу пікірталас тудырды. Кейбірі жасанды интеллект дамуының шынайы серпілісті көрсететінін қолдап, сингулярлықты өнімділіктің күрт өсуімен, ғылыми жаңалықтармен және бұрын емделмейтін ауруларға ем табу мүмкіндігімен байланыстырады. Ал кейбірі сақтық танытып, бақылаусыз технологиялық дамудың қауіптерін еске салады.
Бұл мәлімдеме OpenAI бас директоры Сэм Альтманның бір жыл бұрынғы сөздерінен айтарлықтай батылдау болды. 2025 жылдың басында Альтман адамзат сингулярлыққа жақын екенін айтса да, оның сипаты мен салдары белгісіз екенін атап өткен еді.
Сонымен бірге Anthropic компаниясының президенті әрі негізін қалаушы Даниэла Амодей «жалпы жасанды интеллект» ұғымы өзектілігін біртіндеп жоғалтып бара жатқанын жеткізді. Оның сөзінше, бастапқыда бұл термин ЖИ адам мүмкіндіктерімен теңесетін кезеңді көрсетуге арналған болса, қазір кейбір көрсеткіштер бойынша бұл межеден өтіп кеткен.
