Hazelight Studios ұсынған жаңа кооперативті ойын тек сарапшылардың ғана емес, қарапайым ойыншылардың да көңілінен шықты. Steam платформасында жарық көрген алғашқы күннің өзінде-ақ Split Fiction 97% жоғары бағаға ие болып, мың бес жүзден астам “өте оң” пікір жинады.
Танымал әзірлеуші Юсеф Фарес пен оның студиясы тағы да тек жұптасып ойнауға арналған ерекше ойын ұсынып отыр. Бұл жолы да ол алуан түрлі ойын тәсілдері мен сан қырлы әлемдері арқылы таңғалдырмақ.
Юсеф Фарестің «A Way Out» және «It Takes Two» ойындары кооперативтік геймплейдің жаңа мүмкіндіктерін көрсетті. A Way Out түрмеден қашуды тек екі ойыншының бірлескен әрекеті арқылы жүзеге асыруға мүмкіндік берсе, It Takes Two отбасылық мәселелерді шешу идеясын ерекше стильде бейнелеп, 2021 жылы жылдың үздік ойыны атағын жеңіп алған еді. Енді осы қатарға «Split Fiction» ойыны қосылды.
Split Fiction-ның бас кейіпкерлері – Мио мен Зои. Олар – өз жанрларында жазатын, бірақ еңбектері әлі жарық көрмеген екі жас жазушы. Мио ғылыми-фантастика жанрында, ал Зои фэнтези бағытында жұмыс істейді. Бір күні күтпеген жерден ірі баспаханадан ұсыныс алады. Бірақ шын мәнінде, оларды алдап, футуристік VR-симуляцияға енгізіп жібереді. Мио қатысудан бас тартпақ болғанда, ол абайсызда Зои-дің әлеміне тап болады. Енді екеуі бірігіп, симуляциядағы оқиғалардан өтіп, шынайы өмірге оралу жолын табуы қажет.
Ойын кейіпкерлерінің мінездері өте шынайы әрі жақсы сомдалған. Мио – шытырман оқиғаларға құмар, тәуекелден қорықпайтын қайсар қыз. Оның ғылыми-фантастикалық әңгімелері қуатты мотоциклдер, ғарыш кемелеріндегі шайқастар мен экшнге толы сюжеттерден тұрады. Ал Зои – Мионың қарама-қайшы бейнесі. Ол сиқыр мен таңғажайып тіршілік иелеріне толы мейірімді фэнтези әлемін ұнатады. Дегенмен, олардың ортақ тұстары да аз емес: ең бастысы – екеуін де шығармашылыққа деген құштарлық байланыстырады. Бұл сапар оларды жақындастырып, қиындықтарды бірге еңсеруге жетелейді.
Split Fiction – It Takes Two ойынындағы әдістерді жаңа деңгейге көтеріп, бірнеше жанрды үйлесімді біріктірген ерекше жоба. Ойыншылар бірде қарсыластарымен айқасса, бірде жылдамдық пен ептілік сыналатын жарыстарға қатысады, кейде ырғаққа негізделген сынақтардан өтсе, енді бірде күрделі тапсырмаларды орындайды. Әр кейіпкердің өзіне тән ерекше мүмкіндіктері бар. Ал ойын ішіндегі сынақтар қарапайым көрінгенімен, оларды еңсерудің түрлі жолдары бар. Ойын әр 20-30 минут сайын жаңа элементтер қосып, қызығушылықты үнемі арттырып отырады.
Бір сәтте Мио мен Зои болашақ мегаполисінің әуе жолдарында жүйткіген көліктердің үстімен секіріп, зұлым корпорация басшысына жетуге ұмтылса, келесіде айдаһар өсіріп, ежелгі құбыжықпен шайқасуға тура келеді. Бұл жай ғана көріністің ауысуы емес, ойын тәсілінің түбегейлі өзгеруі. Екі ойыншыға да үйлесімді әрекет ету қажет, алайда олар көбіне мүлде бөлек тапсырмаларды орындап, ортақ мақсатқа бірге жетуге талпынады.
Split Fiction түрлі платформаларда жоғары бағаға ие болды:
OpenCritic: 91 балл (100% рецензенттердің ұсынысымен, 31 шолудың негізінде);
Metacritic: PlayStation 5 нұсқасы – 90 балл (45 рецензия бойынша);
Metacritic: PlayStation 5 нұсқасы – 91 балл (13 рецензия бойынша);
Metacritic: Xbox Series нұсқасы – 92 балл (4 рецензия бойынша).
Split Fiction – қарқынды ойын процесі мен түрлі жанрлардың үйлесімін ұсынатын ерекше жоба. Кооперативтік мүмкіндіктері шебер ойластырылып, ойыншыларға ұмытылмас әсер қалдырады.
