Бүгінде Отбасының цифрлық картасында 6,2 миллионнан астам отбасы құрамына кіретін шамамен 20 миллион азамат туралы мәлімет жинақталған. Жүйе Smart Data Ukimet ақпараттық-талдау платформасы негізінде жұмыс істейді және мемлекеттік органдардың 30-ға жуық ақпараттық жүйесімен ықпалдастырылған. Бұл мемлекеттік деректерді әлеуметтік қолдауды азаматтардың нақты қажеттілігіне қарай ұйымдастыруға және оны алуды жеңілдетуге мүмкіндік береді.
Мемлекеттік ақпараттық жүйелердегі деректер негізінде Отбасының цифрлық картасы отбасы құрамына қатысты мәліметтерді автоматты түрде қалыптастырып, оның әлеуметтік әл-ауқат деңгейін айқындайды. Бұл ретте отбасының табысы, еңбек қызметі, әлеуметтік төлемдері, тұрғын үй жағдайы, мүліктік ахуалы, денсаулығы мен білімі туралы ауқымды ақпарат ескеріледі.
Отбасының цифрлық картасының негізгі артықшылықтарының бірі мемлекеттік қызметтерді азаматтың өтінішін күтпей, алдын ала ұсыну мүмкіндігі болып саналады. Қолда бар деректер негізінде азаматтың белгілі бір әлеуметтік қолдау шарасын алуға құқығы бар екені анықталған жағдайда, оған 1414 нөмірінен SMS хабарлама жіберіледі. Азамат келісім бергеннен кейін қызметті рәсімдеу автоматтандырылған тәртіппен жүзеге асырылады.
Қазіргі уақытта Отбасының цифрлық картасы арқылы жәрдемақылар мен әлеуметтік төлемдердің 11 түрін алуға, сондай-ақ хабарламалардың үш түрін жолдауға мүмкіндік қарастырылған. Олардың қатарында бала тууға және оны күтуге байланысты төлемдер, жұмысынан немесе асыраушысынан айырылған жағдайда берілетін төлемдер, мүгедектікке байланысты жәрдемақылар, көпбалалы отбасыларға арналған жәрдемақылар және мемлекеттік қолдаудың өзге де шаралары бар.
Мемлекеттік қызметтерді алдын ала ұсыну тәсілін енгізудің нәтижелері нақты көрсеткіштерден де байқалады. Азаматтарға мемлекеттік қызметтерді алу келісімін беру үшін 2 миллионнан астам SMS хабарлама жіберіліп, 935 мыңнан астам адамға қызметтер мен төлемдер өтінішсіз, алдын ала белгіленген тәртіппен тағайындалды.
Отбасының цифрлық картасының мүмкіндіктерін жергілікті атқарушы органдар да халықпен неғұрлым нысаналы жұмыс жүргізу үшін пайдаланады. Қолда бар мәліметтер арқылы мамандар табысы, активтері, медициналық сақтандыруы немесе тұрақты тұрғылықты жері бойынша тіркеуі туралы ақпарат жоқ азаматтарды анықтай алады. Бұл түсіндіру жұмыстарын дер кезінде жүргізуге, кеңес беруге және тиісті негіз болған жағдайда қажетті әлеуметтік қолдау шараларын көрсетуге мүмкіндік береді.
Өңірлердегі жұмыстың тиімділігін арттыру мақсатында арнайы мониторинг модулі қарастырылған. Ол отбасылар туралы мәліметтердің жаңартылуын және D және E санаттарына жатқызылған отбасылармен жүргізілген жұмыстың нәтижелерін ескереді.
2027 жылғы 1 қаңтардан бастап Отбасының цифрлық картасының жұмыс істеу тәсілдерін одан әрі жетілдіру көзделіп отыр. Ол әлеуметтік-еңбек саласындағы платформада талдау құралы ретінде дамытылып, бұл ретте цифрлық үкімет платформасындағы және мемлекеттік органдардың цифрлық жүйелеріндегі деректер пайдаланылмақ.
Сонымен қатар мемлекеттік органдардың Отбасының цифрлық картасын жүргізу кезінде өзара іс-қимыл жасау тәртібін бекіту көзделеді. Бұл тәртіпте пайдаланылатын деректерді енгізу, олардың толықтығы мен дұрыстығын қамтамасыз ету мәселелері де қамтылады.
Қосымша материалдар мен сараптамалық шолуларды біздің Telegram арнамыздан оқуға болады.
