Huawei Mate X7 – биылғы жылдың премиум санатындағы алғашқы смартфондардың бірі. Қысқа уақыт ішінде ол пайдаланушылардың қызығушылығын айтарлықтай арттыра алды. Бұл шолуда аталған модельдің неліктен кең сұранысқа ие болып отырғанын жан-жақты талдауға тырысамыз. Әсіресе жаңалық туралы естіп үлгергенімен, әлі қолданып көрмеген оқырман үшін бұл ақпарат пайдалы болмақ.
Ең алдымен қаптамадан бастайық, себебі ол да назар аударуға әбден лайық. Huawei Mate X7 смартфоны қара түсті, күңгірт реңкті, аса сәнді қорапқа салынған. Қорап бетінде алтын түсті әріптермен жазылған атауы бірден көз тартады. Ішкі құрылымы да ұқыпты ойластырылған: құрылғы мен қосымша керек-жарақтар дизайнерлік үйлесіммен орналастырылған. Бұл компанияның өз тұтынушыларына деген жауапкершілігін айқын көрсетеді.
Жинақталымы
Қорапты ашқанда ең үстінде орналасқан смартфонды алғаннан кейін, келесі құрамдас бөліктерді көреміз: екі портпен жабдықталған 66 Вт қуатты зарядтау құрылғысы, кабель, қолға жағымды жұмсақ материалдан жасалған қорғаныш қап және SIM-карта салуға арналған арнайы кілт. Барлық элементтер премиум сегментке тән талапқа сай жеке-жеке қара қораптарға ұқыпты салынған.
Huawei Mate X7-ге арналған қорғаныш қап тек сыртқы әсерден қорғап қана қоймай, құрылғының топсалы механизмін де сақтайды. Сонымен қатар оның тағы бір ыңғайлы қызметі бар: қаптағы металл тіреуіш ашылып, айнала алады, сол арқылы смартфонды тірек ретінде қоюға мүмкіндік береді.
Осы тіреуіштің көмегімен құрылғыны ашылған және жабылған күйінде тік те, көлденең де орналастыруға болады. Бұл әсіресе бейне көру немесе бейнеқоңырау кезінде қолайлылық туғызады.
Дизайн және эргономика
Алғаш көзге түсетіні – құрылғының нәзік әрі үйлесімді келбеті. Салмағы небәрі 236 грамм болғанына қарамастан, ол өте ыңғайлы әрі қолға жақсы үйлеседі. Бүйір жақтаулары металлдан жасалған, бұл смартфонға қосымша беріктік беріп қана қоймай, оның сыртқы көрінісіне жинақылық пен айқын стиль дарытады. Дөңгеленген бұрыштары ұзақ уақыт пайдаланғанда алақанға батпайды, әсіресе ашылған күйде қолданғанда бұл маңызды.
Артқы бетінде камералар жүйесі орналасқан көлемді модуль бар. Бұл бөлік сырғанамайтын, қолға жағымды экологиялық былғарымен қапталған. Мұндай материалдың тағы бір артықшылығы – саусақ ізі қалмайды. Соның арқасында смартфон әрдайым таза әрі ұқыпты көрінеді.
Түстерге қатысты бірнеше нұсқа ұсынылған. Сынақ үшін маған қатаң, салмақты қара түсті үлгісі берілді. Сонымен қатар ақ және қызыл түстері де бар. Таңдау — пайдаланушының талғамына байланысты.
Смартфонның оң жақ қапталында, жоғарғы бөлігінде дыбыс деңгейін реттеу және қосу батырмалары орналасқан.
Стерео динамиктер құрылғының жоғарғы және төменгі қырларына орналастырылып, екі бөлікке бөлініп берілген. Соның нәтижесінде дыбыс кең ауқымды, анық әрі жеткілікті деңгейде қатты шығады. Әсіресе төменгі жиіліктердің берілуі айқын байқалады.
Динамиктерден бөлек, төменгі қапталда екі Nano-SIM картасына арналған слот орналасқан. Оның жанында USB Type-C порты бар. Бұл порт тек қуат беру мен деректер алмасуға ғана емес, сонымен қатар DisplayPort Alt Mode технологиясын қолдайды. Яғни жоғары сапалы бейне мен дыбысты сыртқы құрылғыларға тікелей жеткізуге мүмкіндік береді. Мұндай мүмкіндік презентациялар өткізу, оқу сабақтарын ұйымдастыру, баяндама жасау немесе көпшілік алдында сөз сөйлеу кезінде айрықша қолайлы.
Ал қосымша жад карталарын орнату бұл смартфонда қарастырылмаған. Дегенмен қазіргі ішкі жады көлемін ескерсек, мұндай қажеттілік аса сезілмейді.
Деректердің қауіпсіздігін қамтамасыз ету үшін саусақ ізі арқылы тану және бет-әлпетті анықтау жүйелері енгізілген. Бұл шешім құрылғыны жылдам әрі ыңғайлы түрде қорғауға мүмкіндік береді.
Ерекше тұстардың бірі ретінде инфрақызыл портты атап өтуге болады. Ол да бар, алайда бұрынғыдай жоғарғы бөлікте емес, енді артқы камера модульдерінің жанында орналасқан. Сондықтан теледидарды немесе өзге де «ақылды» техниканы басқару үшін смартфонның дәл осы бөлігін бағыттау қажет.
Екі бірдей сапалы дисплей
Жиналған күйінде де Huawei Mate X7 қалыңдығы жағынан өте ықшам көрінеді — небәрі 9,5 мм. Бұл көрсеткіш оны кәдімгі жиналмайтын смартфондармен бір деңгейге қояды.
Құрылғының жиналған кездегі толық өлшемі — 157×74×9,5 мм.
Сыртқы экран Huawei компаниясының өз әзірлемесі саналатын екінші буындағы аса берік Kunlun Glass 2 әйнегімен қорғалған. Өндірушілердің мәліметінше, бұл қорғаныс қабаты алдыңғы нұсқамен салыстырғанда 20%-ға мықты әрі құлауға төзімді.
Алдыңғы бетінде 6,49 дюймдік OLED дисплей орналасқан. Оның ажыратымдылығы — 1080×2444, пиксель тығыздығы — 412 ppi, ал жаңарту жиілігі — 120 Гц. Жиналған күйінде Huawei Mate X7 жіңішке әрі ұзынша форматта (21:9 қатынасында) жасалған, бұл оны, әсіресе, нәзік әйел қолына да ыңғайлы етеді.
Смартфон оңай ашылады. Қажет болған жағдайда оны толық емес, жартылай ғана ашып, шағын ноутбук тәрізді қолдануға болады.
Ал толық ашылған кезде құрылғы шаршы пішінді планшетке айналады.
Топсалы механизмі 3.0 буындағы аса берік болаттан жасалған және сансыз көп ашып-жабуға есептелген.
Смартфон толық ашылған сәтте Huawei Mate X7-нің қаншалықты жұқа екенін бірден байқауға болатынына назар аударыңыз.
Смартфонды ашқанда ең алдымен көзге түсетіні — ішкі жағындағы сегіз дюймдік сенсорлы OLED дисплей. Оның ажыратымдылығы 2210×2416, пиксель тығыздығы 412 ppi, ал жаңарту жиілігі 120 Гц.
Оның өлшемдері: 157×144×4,5 мм. Huawei Mate X7 құрылғысын құжаттармен, мәтіндермен, фото және бейнематериалдармен жұмыс істеуде планшет ретінде пайдалану ерекше қолайлы.
Құрылғының беріктігі қандай деңгейде деген сұрақ орынды. Ішкі дисплей үш қабаттан тұрады. Оның құрамында неньютондық сұйықтыққа негізделген қорғаныш қабаты бар. Соққы кезінде мұндай материал қатты дене тәрізді қасиет көрсетеді. Сонымен қатар ультра жұқа икемді әйнектен жасалған соққыға төзімді қабат және көміртек талшықтарынан құралған тірек қабаты үйлесім тапқан.
Соның нәтижесінде құрылғының бүгілуге төзімділігі жүз пайызға артқан. Ілмек орналасқан тұстағы сызық бұрынғыдан да байқалмайтын деңгейге жетіп, тіпті толық экран режимінде контент қарағанда да көзге кедергі келтірмейді.
Ішкі экран арнайы қорғаныш қабықпен қапталған. Бұл қабық құрылымның ажырамас бөлігі болғандықтан, оны алып тастауға болмайды.
Сыртқы және ішкі экрандардың негізгі техникалық сипаттамалары өзара ұқсас. Айырмашылығы тек өлшемі мен экран пішімінде. Көзді қорғауға арналған арнайы баптау қарастырылған, ол көк жарықтың қарқындылығын азайтады. Экран жарықтығы қоршаған ортаға байланысты автоматты түрде реттеледі. Қалыпты жағдайда жарықтық 575 нитке дейін төмендейді, ал ашық күн астында 1520 нитке дейін артады. Бұл біздің климаттық жағдайымыз үшін маңызды артықшылық болып саналады. Күннің жарығында да мәтін анық көрініп, фото және бейнематериалдарды еш қиындықсыз қарауға болады. Қажет болған жағдайда қараңғы ортада жарықтықты қолмен қосымша азайту мүмкіндігі де бар.
Бағдарламалық қабықша жиналмалы құрылғы форматына бейімделген. Қарапайым қосымшалардың басым бөлігі смартфонды ашқанда немесе жапқанда өздігінен бейімделіп, экран өлшеміне сәйкес кеңейеді.
Алайда ойындарға келгенде бұл үдеріс әрдайым тұрақты жұмыс істей бермейді. Сондықтан оларды алдын ала таңдалған экран режимінде іске қосу ұсынылады.
Үлкен экранда кез келген контент ерекше әсер қалдырады. Түстер қанық әрі табиғи көрінеді, бейне бірқалыпты және кідіріссіз ойнатылады.
Huawei Mate X7 құрылғысы IP58 және IP59 стандарттарына сай қосарланған қорғаныс деңгейіне ие. Теориялық тұрғыда оны жылы сумен жууға да болады, алайда тәжірибе жүзінде мұндай әрекетке жүгінудің қажеті шамалы.
Дегенмен су тамшылары, жаңбыр астында түсірілім жүргізу немесе абайсызда төгілген шай құрылғыға зиян келтірмейді.
Мысалы, қарлы жағдайда жүргізілген сынақ барысында смартфон ешқандай зақымсыз жұмыс істей берген. Осы тұрғыдан алғанда оның суға төзімділік деңгейі көптеген заманауи смартфондардан кем түспейді.
Әсерлі камералар жиынтығы.
Камера мүмкіндіктеріне тоқталсақ, Huawei Mate X7 смартфоны әртүрлі фокустық қашықтыққа бейімделген үш негізгі артқы камерадан тұратын кешенді жүйемен жабдықталған.
Бұл – 50 Мп негізгі камера, 1/1,28″, f/1,5—f/4,0, 24 мм, фазалық автофокус (PDAF) және оптикалық тұрақтандыру (OIS) жүйесімен толықтырылған.
Телефото объектив – 50 Мп, f/2,2, 81 мм, фазалық автофокус пен оптикалық тұрақтандыруы бар, 3,5 еселік оптикалық үлкейту мүмкіндігін ұсынады.
Кең бұрышты камера – 40 Мп, f/2,2, 13 мм, фазалық автофокус, көру бұрышы 120˚.
Көктемнің бастапқы кезеңінде қала ішінде де, одан тыс аумақта да түрлі-түсті көріністерді табу оңай емес. Әсіресе ауа райы құбылмалы болса, қар, жаңбыр мен тұман табиғи реңктерді көмескілей түседі.
Сондықтан қалалық саябақтар мен шағын бақтарды аралап шыққан соң, әсерлі әрі жарқын кадрлар үшін музейге бет алдық.
Байқасақ, түсірілген фотосуреттер сапалы, айқын әрі түстері қанық. Мұндай нәтиже жарқын әрі әсерлі бейнелерді ұнататындар үшін таптырмас мүмкіндік.
Камералар нысанға дейінгі арақашықтыққа қарай өздігінен ауысып отырады.
Үлкейту мүмкіндігі де жоғары деңгейде жұмыс істейді. Тіпті штатив қолданбай түсірілген кадрлардың өзі анық әрі сапасын жоғалтпайды. Мұны бірнеше фотосуретті салыстыру арқылы байқауға болады.
Ұсақ нысандарды жақын қашықтықтан түсіру үшін макрофокус режимі қолданылады.
Сонымен қатар қозғалыстағы нысандарды түсіруге арналған арнайы режим бар. Ол балаларды, спорттық сәттерді немесе жануарларды түсіруде аса қолайлы. Бұл режим макрофокуспен түсірген кезде де тиімді жұмыс істейді.
Камералардың жоғары техникалық мүмкіндіктері кадрлардың анықтығын арттырып, ұсақ бөлшектердің де дәл берілуіне жағдай жасайды.
Портрет режимінде түсірілген суреттер де ерекше сапасымен және табиғи тереңдігімен ерекшеленеді.
Huawei Mate X7 құрылғысымен шығармашылық мүмкіндіктер шексіз деуге болады. Смартфонды толық ашып, планшет тәрізді форматта түсіруге болады.
Сондай-ақ құрылғыны жиналған күйінде де кәдімгі смартфон ретінде пайдаланып, ыңғайлы түсірілім жасауға мүмкіндік бар.
Құрылғыны жартылай бүктеп, шағын ноутбук тәрізді форматта да пайдалануға болады. Мұндай күйде ол жұмыс істеуге де, контент қарауға да ыңғайлы баламаға айналады.
Камералары жарық тапшылығы анық байқалған жағдайдың өзінде қосымша функцияларды қоспай-ақ кадрдың жарық балансын сәтті реттеп, сапалы нәтижеге қол жеткізеді.
Салыстыру үшін кадрдағы нысанның адам көзімен қалай қабылданатынын көрсететін түсірілімдер де ұсынылады.
Қажет болған жағдайда түнгі түсіру режимін қосуға болады. Бұл режимде түсірілген суреттердің түс реңкі біршама салқындау келеді.
Кең бұрышты камера да жақсы нәтиже көрсетеді. Дегенмен кадрдың шеткі бөліктерінде аздаған геометриялық бұрмаланулар байқалуы мүмкін.
Ал селфи-камераны туралы айтпаса даболмайды.
Техникалық ерекшеліктеріне байланысты Huawei Mate X7 құрылғысында екі алдыңғы камера қарастырылған. Бірі смартфон жабық күйде, екіншісі ашық күйде пайдалануға арналған.
Екі камера да 8 мегапиксельді. Ішкі экрандағы камераның диафрагмасы f/2,2 болса, сыртқы экрандағысы f/2,4 көрсеткішіне ие.
Екі камера да кең динамикалық ауқымымен және айқын детализациясымен ерекшеленеді.
Жарық жеткіліксіз жағдайда да портреттік түсірілім кезінде сапалы, анық кадрлар алуға мүмкіндік береді.
Бейнетүсірілімге келсек, артқы камераның барлық модульдері 4K форматында видео жаза алады. Кіріктірілген гироскопқа негізделген электронды тұрақтандыру жүйесі (gyro-EIS) арқасында қозғалыс кезінде де бейне сапасы көңіл қуантады. Жүгіру барысында түсірілген кадрлардың өзі артық дірілсіз, анық әрі ұсақ бөлшектерге бай болып шығады. Дыбыс жазу сапасы да жоғары деңгейде, сыртқы шуларды шамадан тыс бұзбай, таза жеткізеді.
Жасанды интеллектке негізделген функциялар
Қазіргі заманғы смартфондардың басым бөлігі сияқты Huawei Mate X7 де фото және бейнемен жұмыс істеуде жасанды интеллект мүмкіндіктерін пайдаланады.
Мәселен, құрылғы арқылы анимациялық фотосуреттер жасауға болады.
Сондай-ақ портреттегі мимиканы жетілдіріп, бірнеше нұсқаның ішінен ең сәттісін таңдауға мүмкіндік бар. Түстерді қанықтырып, айқындауға немесе керісінше жұмсақ пастель реңктерге көшіруге болады.
Дегенмен мұндай құралдардың саны күткендегідей көп емес, ал олардың мүмкіндіктері әзірге шектеулі деңгейде қалып отыр. Мысалы, Галереядағы нысанды өшіру функциясы әрдайым мінсіз нәтиже бере бермейді.
Техникалық сипаттамалары мен өнімділігі
Құрылғының өзінде нақты қандай процессор орнатылғаны көрсетілмегенімен, сынақ барысында Huawei Mate X7 моделінде Kirin 9030 Pro процессоры қолданылғаны анықталды. Техникалық қырларына қызығатындар үшін айта кету керек, бұл процессор 9 ядродан және 14 ағыннан тұратын архитектураға негізделген. Оның ішінде 2,75 ГГц жиіліктегі негізгі ядролар, 2,27 ГГц жиіліктегі өнімді ядролар және 1,72 ГГц жиіліктегі үнемді ядролар бар. Жұқа әрі жиналмалы смартфон үшін мұндай деңгейдегі процессор айтарлықтай қуатты шешім саналады.
Операциялық жүйеге келсек, Huawei Mate X7 құрылғысында Android 12 негізінде жұмыс істейтін EMUI 15 қабықшасы орнатылған.
Тәжірибеде смартфон тұрақты әрі сенімді жұмыс істейді. Интерфейс бірқалыпты, кідіріссіз әрекет етеді, қосымшалар жылдам ашылады.
Орташа деңгейдегі графикалық баптауларды талап ететін ойындарды еркін іске қосады. Алайда ұзақ уақыт ойын ойнау әрдайым қолайлы бола бермейді. Жақсартылған булану камерасы болғанымен, ұзақ жүктеме кезінде құрылғы қыза бастайды да, өнімділігі төмендейді. Бұл әсіресе смартфон жиналған күйде қолданылғанда айқын байқалады.
Осыны ескере отырып, бұл модельдің ойынға арнайы арналмағанын атап өткен жөн. Күнделікті қолдану барысында құрылғы тиімді салқындап, өнімділіктің төмендеуі байқалмайды.
Жедел жады мен сақтау мүмкіндігі
Жинақ нұсқаларына тоқталсақ, бұл модель бір ғана конфигурацияда ұсынылған. Жедел жады көлемі LPDDR5X стандарты бойынша 16 ГБ, ал ішкі жады 512 ГБ көлемінде берілген.
Танымал бенчмарк тесттеріндегі бағалар мен нәтижелер:
Аккумулятор.
Бұл құрылғының жиналмалы әрі өте жұқа смартфон екенін ескерген жөн. Соған қарамастан, ол сыйымдылығы 5600 мА·сағ болатын қуатты аккумулятормен жабдықталған. Сонымен қатар көлемі 8 дюйм болатын үлкен экранға ие бола тұра, автономды жұмыс істеу уақыты да көңіл қуантарлық деңгейде. Ішкі экранды пайдаланған жағдайда құрылғы үздіксіз оқу режимінде 20 сағатқа дейін, бейне көру барысында 18 сағатқа дейін, ал 3D ойындарда шамамен 6 сағатқа дейін жұмыс істей алады. Сыртқы экранды қолданғанда бұл көрсеткіштер одан да жоғары болады. Демек, бір күндік пайдалануға аккумулятор толық жеткілікті. Оның үстіне смартфонды қуаттау да еш қиындық туғызбайды.
Жинақ құрамында қуаты 66 Вт болатын сымды қуаттағыш берілген. Ол аккумуляторды 30 минут ішінде 80 пайызға дейін, ал 45 минутта толықтай зарядтай алады. Бұдан бөлек, сымсыз қуаттау мүмкіндігі де қарастырылған.
Кемшіліктері.
Кез келген құрылғы сияқты Huawei Mate X7 моделінің де әлсіз тұстары бар. Атап айтқанда, жасанды интеллектке негізделген функциялары шектеулі және ең жоғары графикалық баптауларды талап ететін ойындарда өнімділігі жеткіліксіздеу.
Қорытынды.
Huawei Mate X7 – сыртқы келбеті сәнді, аса жұқа әрі жиналмалы форматтағы заманауи смартфон. Екі бірдей сапалы экранмен, су мен шаңнан қорғаныс жүйесімен, қуатты камералар жиынтығымен және өз санатындағы құрылғылар үшін әсерлі автономдылық көрсететін аккумулятормен ерекшеленеді.
Құжаттармен жұмыс істеу, әртүрлі контентті қарау, фото және бейне түсіру мен өңдеу сияқты күнделікті міндеттерді еш қиындықсыз орындайды. Сондай-ақ жоғары талап қоймайтын ойындарды да еркін іске қосады. Жалпы алғанда, жиналмалы смартфондарға қызығушылық танытатын пайдаланушылар үшін тартымды нұсқа, алайда жоғары өнімді ойындарды қалайтындар үшін ең қолайлы таңдау бола бермейді.
Фото мен мақала авторы: Юлия Павловская
