Бас прокуратураның Құқықтық статистика және арнайы есепке алу комитеті, Цифрлық даму министрлігі және «Ұлттық ақпараттық технологиялар» АҚ eGov mobile қосымшасы мен GOV.KZ порталында жаңа мүмкіндік ұсынды.
Бұл бөлім азаматтарға алаяқтық, есірткі қылмыстары, тұрмыстық зорлық-зомбылық, кибербуллинг, жол-көлік оқиғалары, қыз алып қашу және самокат қолдану кезіндегі тәртіп бұзушылықтарға қатысты бағыт-бағдар береді. Мұнда қадам-қадамымен түсіндірілген нұсқаулықтар бар: әр жағдайдағы заңдық тәуекелдер түсіндіріліп, ресми дереккөздерге сілтеме беріледі.
Жаңа бөлім қарапайым азамат үшін «құқықтық жолсілтеме» іспетті. Ол әртүрлі жағдайда қандай қадам жасау керегін көрсетіп, ықтимал қауіп туралы алдын ала ескертеді. Сондай-ақ пайдаланушы қажет болған жағдайда бірден 102 нөміріне хабарласа алады немесе Qamqor.gov.kz порталы арқылы шағым жолдай алады.
Құқық қорғау органдарының айтуынша, басты мақсат – құқықтық көмекті барынша қолжетімді әрі түсінікті ету. Енді азаматтарға кеңес алу үшін мекемелерге арнайы барудың қажеті жоқ, бәрін онлайн орындауға болады.
Айта кетейік, дәл осындай құқықтық нұсқаулықтар қазірдің өзінде мемлекеттік органдардың бірыңғай интернет-платформасы GOV.KZ сайтында да қолжетімді.
