Қазақстандағы eGov Mobile мобильді қосымшасы жаңа мүмкіндіктерімен пайдаланушыларға ұсынылды. Цифрлы даму, инновациялар және аэроғарыш өнеркәсібі министрлігінің хабарлауынша, қосымша жаңа интерфейс, интеллектуалды іздеу жүйесі, жасанды интеллектіге негізделген чат-ассистент және жеңіл навигациямен толықты. Соңғы бес жылда қосымшаны пайдаланушылар саны алты есеге өсіп, 11 миллионнан асты.
Ең басты жаңалықтардың бірі – интеллектуалды іздеу. Қолданушы іздеу жолына сұрау енгізгенде, жүйе барлық сәйкес нәтижелерді , жеке мемлекеттік қызметтер мен «Өмірлік жағдайлар» бөліміндегі материалдарды көрсетеді. Іздеу жолағының қасында eGov AI белгішесі пайда болды. Оны басу арқылы виртуалды көмекші чат ашылып, қажетті қадамдарды нұсқап, қолданушыны тиісті қызметке бағыттайды.
Қосымшаның интерфейсі ыңғайлылық пен жылдамдыққа басымдықпен жасалған. Басты экранда ең көп қолданылатын қызметтердің белгішелері, цифрлық құжаттарға жылдам сілтемелер және тақырыптық құрылымдалған мемлекеттік қызметтер каталогы орналастырылған. Жеке куәлік, паспорт және басқа маңызды құжаттар қосымшаны ашқан кезде бірден көрінеді, бұл оларды немесе QR-кодты тексеру үшін дереу көрсетуге мүмкіндік береді.
«Өмірлік жағдайлар» бөлімінде қолданушыға әртүрлі тапсырмаларды орындауға арналған толық нұсқаулықтар жинақталған. Жүйе интерактивті сауалнама арқылы жеке ұсыныстар береді.
Жаңартуда ақпараттық қауіпсіздік күшейтіліп, хабарламалармен жұмыс оңтайландырылды. Жеке профиль функциялары кеңейіп, енді онда отбасы, денсаулық, еңбек қызметі, мүлік және айыппұлдар туралы ақпарат қолжетімді. eGov QR қызметі жетілдіріліп, хабарламалар тақырыптар бойынша топтастырылды.
eGov Mobile қосымшасын жетілдіру Цифрлы даму, инновациялар және аэроғарыш өнеркәсібі министрлігінің Мемлекеттік қызметтер комитеті мен «Ұлттық ақпараттық технологиялар» АҚ бірлесіп жүзеге асырды.
