Қазақстанда цифрлық қаржы активтері нарығын заңдастыру жөніндегі нормалар қабылданды. Ұлттық банк LS порталының сауалына берген жауабында жаңа жүйені дамыту және реттеу бойынша жоспарларымен бөлісті.
Заңның мақсаты – цифрлық қаржы құралдары саласында ұлттық индустрия құру, криптовалюта нарығын ашық әрі заңды негізде дамыту, сондай-ақ азаматтар мен бизнестің тәуекелдерін халықаралық стандарттарға сәйкес төмендету.
Енді елімізде цифрлық активтер, оның ішінде криптовалюталар айналымын осы қызметті ұсынатын операторлар арқылы жүргізуге мүмкіндік қарастырылған. Мұндай ұйымдар өз қызметін лицензия негізінде жүзеге асырады.
Сонымен қатар заң криптовалюталардың заңсыз айналымына жол бермей, салаға жүйелі тәртіп орнатуға мүмкіндік береді. Бұл цифрлық активтерді шығару мен айналымға енгізу үшін қажетті инфрақұрылымды қалыптастыруға, сондай-ақ арнайы қызмет көрсететін ұйымдар арқылы ел ішінде кез келген криптоактивтің заңды түрде айналымын қамтамасыз етуге жағдай жасайды.
Ұлттық банк хабарлағандай, жаңа реттелетін нарық азаматтарға криптоактивтер мен криптовалютамен заңды және қауіпсіз операция жүргізуге мүмкіндік береді. Бұл шара криптотранзакциялардың ашық, есепке алынған түрде өтуін қамтамасыз етіп, азаматтардың құқықтары мен мүдделерін қорғайды.
Заңды нарық қаржы активтерін заңсыз айналымнан шығарып, криптоинвесторлардың құқықтары мен қауіпсіздігін күшейтеді. Ұлттық банк арнайы ұйымдар арқылы жүргізілетін операцияларға шектеу енгізіп, айналымға рұқсат етілген криптовалюталардың тізімін бекітеді және инвесторлардың санатына байланысты қосымша талаптар белгілейді.
Реттеуші лицензиялау, бақылау және криптопровайдерлердің қызметін қадағалаумен қатар, криптовалюталардың айналым тәртібі мен шарттарын белгілейді. Цифрлық қаржы құралдарын шығару, айналдыру және қайтару ережелері эмитенттермен бірлесіп әзірленеді. Сонымен қатар, Ұлттық банк ақшамен қамтамасыз етілген тұрақты криптовалюталарды (стейблкоиндер) шығару және пайдалану шарттарын белгілейді.
Реттеуші заңнама әзірлеу кезінде халықаралық қаржы ұйымдарының ұсынымдарын ескеріп, цифрлық активтердің айналымына тән негізгі тәуекелдерді анықтап, оларды төмендету шараларын енгізді. Бұл – қаржылық тұрақтылыққа, тұтынушылардың құқықтарын қорғауға, ақша легализациясына қарсы іс-қимылға, киберқауіптерге және инфрақұрылымның технологиялық осалдықтарына қатысты.
Заң бойынша криптоактив қызметін көрсететін ұйымдар қаржылық бақылау объектілерінің тізіміне енгізіледі және олар заң мен реттеуші талаптарды қатаң орындауға міндетті болмақ.
Дереккөз: https://lsm.kz/legalizaciya-rynka-cifrovyh-finaktivov-chto-izmenitsya
