Apple компаниясы өзінің жаңа M3 Ultra чипін таныстырды. Бұл – Mac Studio құрылғыларына арналған ең өнімді процессор. Apple-дің мәлімдеуінше, M3 Ultra қуаты жағынан тұтынушылық сегменттегі кез келген чиптен әлдеқайда жоғары, тіпті онымен салыстырарлық балама жоқ.
Компанияның айтуынша, M3 Ultra 184 миллиард транзистордан тұрады. Бұл M2 Ultra (134 миллиард транзистор) чипінен айтарлықтай көп. Салыстыру үшін, графикалық процессорлар нарығындағы флагман NVIDIA RTX 5090 92 миллиард транзистордан құралған. Жасанды интеллект жүйелеріне арналған Blackwell GPU (208 миллиард транзистор) одан да жоғары көрсеткішке ие, бірақ ол кең тұтынушыға емес, кәсіпқойларға арналған. Ал M3 Ultra – дәл осы саладағы ең ірі әрі қуатты чип.
Жаңа M3 Ultra чипі UltraFusion технологиясының негізінде жасалған. Бұл – екі M3 Max чипін 10 000-нан астам жоғары жылдамдықты арна арқылы біріктіретін ерекше жүйе. Оның жад өткізу қабілеті 800 ГБ/с-қа дейін жетеді. Apple бұл процессордың 600 миллиард көрсеткіштен тұратын ірі тілдік модельдерді еш қиындықсыз өңдей алатынын айтады.
Бейнеөңдеу мүмкіндіктері де жаңа деңгейге көтерілген. M3 Ultra бір уақытта 22 бейне ағынын (8K ProRes 422) өңдей алады. Сондай-ақ, чипке H.264, HEVC және ProRes кодектерін аппараттық деңгейде өңдеуге арналған арнайы қозғалтқыштар енгізілген.
M3 Ultra – әсіресе бейне өндірісі, графикалық дизайн және жасанды интеллект саласында жұмыс істейтін мамандар үшін таптырмас шешім. Apple компаниясы бұл чипті тұтынушылық нарықтағы ең қуатты процессор деп танып, оның өнімділігі жаңа деңгейге көтерілгенін мәлімдеді.
