Астанада Цифрлық даму министрлігі мен MSSP.GLOBAL компаниясының бірлесуімен журналистер мен медиақызметкерлерге арналған киберқауіпсіздік семинары ұйымдастырылды. Шара CITIZENSEC.KZ жобасының аясында өтті. Жобаның мақсаты – азаматтардың цифрлық сауаттылығын арттыру және интернеттегі қауіпсіз мінез-құлық мәдениетін қалыптастыру.
Семинарға қатысушылар тек дәрістер тыңдап қана қоймай, практикалық тапсырмаларға да қатысты. Симуляция барысында олар өздерін киберқорғау маманы ретінде сынап, алаяқтардың әдістерін зерттеп, жүйедегі осал тұстарды анықтап, жеке деректерді қорғау дағдыларын жетілдірді.
Интерактивті бөлімді CITIZENSEC.KZ жобасының негізін қалаушы, ақпараттық қауіпсіздік саласының тәжірибелі сарапшысы Медет Турин жүргізді. Оның сөзінше, журналистерді осындай бағдарламаларға қатыстыру цифрлық қауіптер туралы ақпаратты тереңірек түсініп, оны жауапкершілікпен жеткізуге жол ашады.
Қатысушылар MSSP.GLOBAL компаниясының цифрлық шешімдерімен танысып, медиасаладағы ақпараттық қауіпсіздікті нығайту жолдарын талқылады. Ұйымдастырушылар бұл бастамалар журналистерге тақырыпты жақсы түсініп, оның маңызын кең аудиторияға жеткізуге көмектеседі деп сенеді.
CITIZENSEC.KZ жобасы қазірге дейін Қазақстан бойынша 80 мыңнан астам азаматқа жеткен, ал киберқауіпсіздік саласындағы білім беру бағдарламаларын кеңейту жұмыстары алдағы уақытта да жалғасатын болады.
