Еліміздегі халыққа қызмет көрсету орталықтарында (ХҚКО) мемлекеттік қызметтерді алу тәртібі өзгереді. Енді азаматтар жасанды интеллект негізіндегі eGov GPT көмекшісі орнатылған терминалдар арқылы бірқатар қызметті өз бетінше ала алады. 2026 жылдың соңына дейін ХҚКО-лардың жаңа үлгісін еліміздің тағы 10 өңірінде іске қосу жоспарланып отыр.
Жаңа форматта азаматтар бұрынғыдай маманның көмегіне жүгінбей-ақ, терминалдар арқылы кейбір мемлекеттік қызметті өздері рәсімдей алады. Бұл үшін терминалдарға eGov GPT цифрлық көмекшісі енгізіледі. Қазір төрт өңірде бес цифрлық кеңсе жұмыс істеп тұр. Тағы 10 өңірде жобаны қаржыландыру мәселесі шешілген. Жыл соңына дейін бұл өңірлерде қажетті орынжайларды дайындап, жаңа кеңселерді ашу көзделген.
Жаңа формат Алматы қаласында, Шығыс Қазақстан, Батыс Қазақстан, Солтүстік Қазақстан, Жетісу, Алматы, Жамбыл, Қарағанды, Қостанай және Павлодар облыстарында енгізіледі. Ал Абай, Қызылорда, Ақмола, Ақтөбе, Атырау және Маңғыстау облыстарында жобаны қаржыландыру мәселесі әлі шешілуі керек.
Жасанды интеллект арқылы қандай қызметтер қолжетімді болады?
Жыл соңына дейін eGov GPT арқылы сұранысқа ие 150-ге дейін мемлекеттік қызметті ұсыну жоспарланып отыр. Бұл қызметтер мемлекеттік қызметтерді пайдаланудың жалпы көлемінің шамамен 80 пайызын құрайды. Осылайша, ХҚКО-лар азаматтарға қызметті маманның көмегімен рәсімдеу үлгісінен біртіндеп цифрлық көмекші арқылы өз бетінше қызмет алу тәсіліне көшеді. Жасанды интеллект және цифрлық даму министрі Жаслан Мәдиевтің айтуынша, жаңа формат Қазақстанның барлық өңірінде қолжетімді болуы тиіс.
Мадина Нұркина
Finratings
Қосымша материалдар мен сараптамалық шолуларды біздің Telegram арнамыздан оқуға болады.
