Қытай 6G байланыс желілерін 2030 жылға қарай коммерциялық айналымға енгізуді көздеп отыр. Бұл туралы Бейжіңде өткен Чжунгуаньцунь форумында сала сарапшылары мәлімдеді. Жаңа буындағы технология тек 5G желісінің жалғасы емес, сапалық тұрғыдан жаңа кезеңге өтуді білдіреді. Себебі 6G желісі бастапқыдан-ақ жасанды интеллектпен тығыз ықпалдастықта жобалануда. Сонымен қатар ол жерүсті, спутниктік және теңіз инфрақұрылымын біріктіріп, әлемнің кез келген нүктесінде тұрақты байланыс орнатуға мүмкіндік береді.
Алдыңғы буындардан айырмашылығы, 6G тек деректерді беру жылдамдығын арттыруға бағытталмайды. Негізгі басымдық желінің зияткерлік деңгейін күшейтуге беріліп отыр. Яғни есептеу мүмкіндіктері тікелей байланыс инфрақұрылымының құрамына енгізіледі. ZTE компаниясының аға вице-президенті Мяо Вэйдің айтуынша, бұл өзгеріс қарапайым қосылу моделінен толыққанды тану мен зияткерлік қызметтерге көшуді білдіреді.
Қытай ғылым академиясының мамандарының мәліметінше, желінің барлық құрамдас бөліктері, базалық станциялардан бастап пайдаланушы құрылғыларына дейін, деректерді өңдеуге және жасанды интеллектпен жұмыс істеуге арналған өзіндік ресурстармен жабдықталады. Нәтижесінде цифрлық қызметтер іс жүзінде кідіріссіз жұмыс істеп, пайдаланушы мен жасанды интеллект арасындағы өзара әрекет бірден жүзеге асады. Мұндай жағдайда жасанды интеллект агенттері деректерді қашықтағы орталықтарға жібермей-ақ, жергілікті деңгейде өңдей алады.
6G технологиясының тағы бір маңызды ерекшелігі – кеңістікті толық қамтитын бірыңғай инфрақұрылымның қалыптасуы. Бұл жүйе ғарыш, әуе кеңістігі, құрлық және теңіз бағыттарын біріктіреді. Егер 5G негізінен жерүсті станцияларына сүйенсе, жаңа буында спутниктердің рөлі арта түседі. Олар шалғай өңірлер мен мұхит аймақтарын қоса алғанда, бүкіл әлем бойынша байланыс тұрақтылығын қамтамасыз етеді.
Қазіргі таңда 6G саласындағы әлемдік патенттік өтінімдердің шамамен 40 пайызы Қытайдың үлесіне тиесілі. Ел бұл бағыттағы зерттеулердің алғашқы кезеңін аяқтап, 300-ден астам технологияны зертханалық сынақтан өткізген. Алдағы жылдары, яғни 2026–2028 жылдар аралығында, әзірленген шешімдерді нақты құрылғыларға енгізу жоспарланып отыр. 2029 жылға қарай алғашқы стандарттар қалыптасып, 2030 жылы пилоттық коммерциялық енгізу басталмақ.
Ұзақ мерзімді болжамдарға сәйкес, 2035 жылға қарай 6G технологиясы жаппай қолданысқа енуі мүмкін. Осы кезеңде 6G қолдайтын смартфондар мен қазіргі желілер аясында жүзеге асыру мүмкін емес жаңа буындағы қосымшалар пайда болады деп күтілуде.
Дегенмен мамандар бұл технологияны енгізу бірқатар қиындықтармен қатар жүретінін атап өтеді. Олардың қатарында инфрақұрылым құнының жоғарылығы, жеткізу тізбектерін дамыту қажеттілігі және жаһандық стандарттар үшін бәсекенің күшеюі бар. Соған қарамастан Қытай ашық әріптестік пен халықаралық ынтымақтастық арқылы бұл үдерісті жеделдетуге ниетті.
Дереккөз: Хайтек+
