SpaceX компаниясы АҚШ аумағында ұялы байланыс желісі жетпейтін аймақтардағы байланысты күшейту үшін спутниктік сигнал қуатын арттыруға рұқсат алды.
АҚШ-тың Федералдық байланыс комиссиясы (FCC) SpaceX-ке T-Mobile серіктесінің жиілік диапазонына жақын спектрлерде қуатты арттыруға рұқсат берді. Бұл шешім басқа желілердің жұмысына кедергі келтірмеу талаптарымен шартталған. Бұған дейін, қараша айында FCC SpaceX-ке Gen2 Starlink спутниктерінің 7500-ін T-Mobile желісінің жиіліктерін пайдалана отырып, жердегі ұялы байланыс қамтымайтын аймақтарды спутниктік сигналмен қамтамасыз етуге рұқсат берген болатын.
Verizon мен AT&T секілді байланыс операторлары SpaceX-тің спутниктік байланыс қуатын арттыруы жердегі мобильді желілердің сапасын төмендетіп, тұрақты жұмысына кедергі келтіруі мүмкін деп алаңдап отыр.
SpaceX техникалық зерттеулерге сүйене отырып, бұл өзгерістер кедергілердің қауіпсіз деңгейде сақталатынын және шұғыл жағдайларда сенімді байланыс орнату мен алыс аймақтарды қамту үшін аса маңызды екенін мәлімдеді.
FCC SpaceX-тің қуатты арттыру ұсынысын орынды деп танып, оның айтарлықтай кедергі келтірмейтінін мәлімдеді.
Қазіргі уақытта тікелей спутниктік байланыс қызметі сынақтан өтуде, бұл процесс шілде айына дейін жалғасады. Қазір төмен орбитадағы алты мыңнан астам Starlink спутнигінің шамамен 500-і смартфондарға тікелей сигнал жіберуге арналған арнаулы жабдықпен жабдықталған.
