Қазақстан Премьер-министрі Олжас Бектенов Алматыда экологиялық қоқыс өңдеу зауытын салуға арналған инвестициялық келісімді екі апта ішінде дайындауды тапсырды. Бұл туралы TuranTimes.kz Үкіметтің Telegram-арнасына сілтеме жасап хабарлайды.
Жоба Қытайда 2024 жылғы қарашада өткен жұмыс сапары барысында жасалған келісімдер аясында жүзеге аспақ. Осы аптада Премьер-министр Олжас Бектенов Қытайдың Shanghai SUS Environment Co., Ltd. компаниялар тобының директорлар кеңесінің төрағасы әрі президенті Лун Цзишэнмен кездесіп, зауыт құрылысының мәселесін талқылады.
Алматыда салынып жатқан зауыт тәулігіне 2 мың тоннаға дейін тұрмыстық қалдық өңдеп, 60 МВт-қа дейін электр энергиясын өндіре алады. Жобаның жалпы инвестиция көлемі – 270 миллион АҚШ доллары. Бұл зауыт қаланың қатты тұрмыстық қалдықтарын өңдеу мәселесін толық шешіп, қайта өңдеу үлесін 2029 жылға қарай 80%-ға дейін жеткізуді көздеп отыр.
“Мемлекет басшысы Қасым-Жомарт Тоқаев 2029 жылға қарай коммуналдық қалдықтарды өңдеу үлесін 38 пайызға жеткізуді тапсырды. Жыл сайын елімізде 4,5 миллион тоннадан астам коммуналдық қалдық жиналады. Сондықтан бұл зауыт – аса қажет бастама. Қалдықтарды экологиялық жолмен кәдеге жарату мен олардан энергия өндіру – қайта өңдеу саласындағы маңызды қадам”, – деді Премьер-министр Олжас Бектенов.
Зауыт 500 жұмыс орнын ашады, оның кемінде 100-і – тұрақты жұмыс орны ретінде есептелді. Жергілікті мамандарды жұмысқа тарту – жобаның басты басымдығы.
Алматы қаласының әкімдігі мен тиісті министрліктерге инвестициялық келісімді дайындау тапсырылды. Зауыттың құрылысы биылғы маусым айында басталады деп жоспарланып отыр.
