Өскемен, Риддер және Алтай қалаларының тұрғындары жақында жаңа буынды бейнебақылау камераларының тұрақты қадағалауында өмір сүреді. Өскемендіктер «Сергек» бақылау жүйесіне біршама үйреніп қалса, бұл өзгеріс қалған қалалар үшін елеулі жаңалық болмақ. Дегенмен, облыс орталығының тұрғындары үшін де, әсіресе жүргізушілер мен жаяу жүргіншілер үшін, көптеген жаңа талаптар енгізілмек, деп хабарлайды YK-news.kz.
Бұл жаңашылдық «ШҚО-да қоғамдық және жол қозғалысын бақылау жүйесін кеңейту және жаңғырту» жобасы аясында жүзеге асырылуда. Жоба Өскеменде, Риддер мен Алтайда бірыңғай VMS платформасын енгізуді көздейді.
«Сергек» жүйесімен салыстырғанда, «Мерген» кешендері радарлық өлшеу әдісін қолданады және техникалық сипаттамалары жағынан жетілдірілген. Олар көлік жылдамдығын анықтаумен қатар, жүргізуші мен жолаушылардың қауіпсіздік белдігін таққанын, телефон қолдануын және басқа да ереже бұзушылықтарды тіркей алады. Сонымен қатар, бұл кешендер түнгі уақытта да түсірілім сапасын қамтамасыз ететін инфрақызыл сәулемен жабдықталған.
Өскеменде 202, Риддерде 24, Алтайда 17 аппараттық-бағдарламалық кешен орнатылады. Қоғамдық тәртіпті бақылау үшін өңірде жалпы саны 1900 жаңа бейнебақылау камерасы қойылады. Бұдан бөлек, Өскеменде бұрыннан бар 2700 камераның бір бөлігіне жасанды интеллект қолданылатын аналитикалық модуль орнатылады.
Жасанды интеллект күдіктілер мен жоғалған адамдарды тану үшін қолданылады. Камералар адамның бет-әлпетін, киімінің түсі мен ерекше белгілерін, мысалы, сақал немесе көзілдірікті анықтай алады. Мұндай камералар 300 нысанға орнатылады, оның ішінде әуежай, теміржол вокзалы, ауруханалар, мектептер мен сауда орталықтары бар.
«Мерген» камералары Өскеменде желтоқсан-қаңтар айларында іске қосылады, ал жобаның толық аяқталуы 2025 жылдың шілдесіне жоспарланған. Бұл жаңашылдық өңірде қауіпсіздік деңгейін арттырып, құқық бұзушылықтардың алдын алуға бағытталған.
