Өскемендегі Oskemen Hub алаңында гастробизнеске арналған мобильді қосымша әзірлеуге бағытталған CodeMasters Hackathon 3.0 жобасы басталды, деп хабарлайды YK-news.kz.
— Жергілікті кәсіпкерлер біздің IT-мамандардың мүмкіндіктерін білгені маңызды.Біз IT-компания ретінде аймақтағы бизнестің дамуына үлес қосып, жастар мен кәсіпорындар арасындағы байланысты нығайтуға тырысамыз. Жас бағдарламашылар тәжірибеден өтіп, өз идеяларын ұсынып, нақты шешімдерін жүзеге асыра алады. Өңірде білікті мамандар мен ірі стартаптар бар, ал Өскеменді Astana Hub-та да жақсы біледі. Бұған қоса, Шығыс Қазақстан бүгінде туризм орталығына айналып келеді. Туризмнің дамуы IT-технологиялармен тығыз байланысты, әсіресе қоғамдық тамақтану саласын айрықша атап өтуге болады. Сондықтан бүгінгі хакатонның маңызы ерекше, – дейді Oskemen Hub менеджері Аделина Мязова.
Хакатон ашылған күні қатысушыларға сайт пен мобильді қосымша әзірлеу тапсырмасы берілді. Бұл жұмысқа он күн уақыт бөлінді.
29 тамыз күні жобалардың ақтық таныстырылымы өтеді. Қатысушылар өз жұмыстарын IT саласының мамандарына, кәсіпкерлерге және ұйымдастырушыларға таныстырады. Жеңімпаздар 500 мың теңгелік жүлдені иеленеді.
Хакатонға тәжірибелі мамандармен қатар жаңа бастап жүрген IT-әуесқойлар, студенттер мен мектеп оқушылары да қатысуда. Бұл жобаның тапсырыс берушісі – Appetite компаниясы. Жақын арада компания өзіне тиесілі жеткізу платформасын іске қосуды жоспарлап отыр. Жоба аясында маркетингтік талдау жүргізу, клиенттермен тікелей байланыс орнату және агрегаторларға тәуелділікті азайту мүмкіндіктері қарастырылған. Жаңа қосымшаның арқасында тұтынушылар тағамды оңай тапсырыс беріп, жеңілдіктерге қатысып, жедел хабарламалар ала алады. Ал әкімшілік тарап мәзірді, тапсырыстарды, науқандарды басқарумен қатар толыққанды аналитиканы жүргізе алады.
Жастар үшін бұл хакатон – білімін шыңдауға, нақты бизнеске арнап жоба жасауға және өз күшін сынауға тамаша мүмкіндік.
Ал жас ерекшелігі бойынша топтарға бөлу мәселесіне келсек, ұйымдастырушылар мұны келесі хакатондарда қарастыруы мүмкін.
— Келешекте қатысушыларды жасы бойынша емес, деңгейіне қарай бөлу жағын ойластырып жатырмыз. Өйткені қазіргі көптеген мектеп оқушылары IT саласында тіпті жас мамандардан да озық. Бұл – олардың ортасы, олардың тынысы. Ал бүгін басталған хакатонда ешқандай бөлініс болмайды, – деді Аделина Мязова.
