Швециядағы Лунд университетінің зерттеушілері адам микробиомын зерттеуге арналған жаңа құралды таныстырды. «Microbiome Geographic Population Structure» (mGPS) деп аталатын бұл жүйе ғаламдық деңгейде деректер жинап, оларды талдау арқылы ғылыми және құқық қорғау салаларында кең мүмкіндіктер ашпақ. Алайда, құралдың тиімді жұмыс істеуі үшін жер шарының әртүрлі аумақтарынан, тіпті инфрақұрылым объектілерінен кең ауқымды мәліметтер жинау қажет. Бұл тапсырма өте күрделі, бірақ оның нәтижелері ғалымдар мен құқық қорғау органдары үшін пайдалы болары сөзсіз.
Микробиомдар тұрақсыз, олар әртүрлі орта мен басқа микробиомдармен қарым-қатынасқа түскенде өзгеріп отырады. Бұл өз кезегінде адамның қай жерде болғанын немесе қандай заттарға қол тигізгенін анықтауға мүмкіндік береді. Мысалы, метрополитен станциясында тұтқаны ұстаған адамның микробиомы сол жерде қалғаны анықталуы мүмкін. mGPS құралын қолдану арқылы осы деректерді жинап, аурулардың таралу жолдарын бақылауға болады. Сонымен қатар, бұл ақпарат құқық қорғау органдары мен арнайы қызметтер үшін де пайдалы болмақ.
mGPS жүйесі жасанды интеллект көмегімен жиналған мәліметтерді салыстырып, адамның нақты қай жерде болғанын анықтайды. Құралдың дәлдігі өте жоғары. Мысалы, Гонконгта екі метрополитен станциясын 172 метр қашықтықтан ажыратқан. Нью-Йоркте, бір метр қашықтықта орналасқан тұтқа мен киоскінің микробиомын айқын ажыратқан. Егер үлгілер саны көп болса, жүйе дәлдігі 92%-ға жетеді, ал аз үлгілермен бұл көрсеткіш 87% болады. Бірақ ескірген немесе ластанған үлгілермен жүйе жұмыс істемейді.
Қазіргі таңда mGPS 53 қаладағы метрополитен станцияларынан 4135 үлгімен оқытылған. Оған қоса, 18 елден алынған 237 топырақ үлгісі мен 9 су қоймасынан алынған 131 теңіз экологиясы үлгісі де қосылған. Бірақ бұл деректер қоры құралды бір елде де тиімді пайдалану үшін жеткіліксіз. Микробиомдар көптеген факторлардың әсерінен өзгеріп отыратындықтан, бұл мәліметтерді үнемі жаңартып отыру керек. Дегенмен, егер бұл жүйе әлемді таза етіп, патогендердің таралу жолдарын анықтауға көмектессе, оның маңызы өте зор.
