Шығыс Қазақстан облысында биылғы жаңа оқу жылы айтарлықтай өзгерістермен басталмақ. Өңірде білім беру саласына қомақты қаржы құйылып, мектептердің жайлылығы, қауіпсіздігі және заманауи технологиялармен жабдықталуы басты назарға алынып отыр. Бұл туралы ШҚО Білім басқармасы басшысының орынбасары Әлима Ақылбек Өңірлік коммуникациялар қызметінде өткен брифингте мәлімдеді.
Ұлттық «Келешек мектептері» жобасы аясында облыста 3 мың орындық 6 жаңа мектеп пайдалануға берілді. Бұл білім ордалары инклюзия мен цифрландыру талаптарына толық сәйкес жасақталған. Сонымен қатар Өскемен қаласындағы Есенберлин көшесінде орналасқан жаңа мектеп те жуырда білім басқармасының балансына өткізілмек.
Зайсан қаласында 300 орындық жаңа мектеп бой көтеріп, 1 қыркүйекте алғашқы оқушыларын қабылдайды. Бұл нысан Білім инфрақұрылымын қолдау қоры есебінен салынды.
Бүгінде облыстағы барлық 347 мектеп интернетке қосылған. Оның ішінде 170 білім ордасында Starlink жүйесі пилоттық жоба ретінде енгізілуде. Бұл оқушыларға цифрлық ресурстарды тұрақты пайдалануға және онлайн білім беру платформаларына еркін қосылуға мүмкіндік береді.
Мектептердің барлығы бейнебақылау мен бақылау жүйелерімен жабдықталған. Жаңа оқу жылында «Әлеуметтік әмиян» жобасы іске қосылады. Бұл ата-аналарға балалардың мектеп асханасындағы тамағын бақылауға жол ашса, жеткізушілер үшін есептіліктің ашықтығын қамтамасыз етеді. Қазірдің өзінде 108 мектепте жүйе толық жұмыс істеп тұр, тағы 191 мектеп «Бизнес-әмиян» мобильді қосымшасына қосылған.
Сонымен қатар облыстағы мектептер жаңа оқу кабинеттерімен толықты. Химия, физика, биология, STEM және робототехника бағытындағы 40 заманауи кабинет сатып алынып, оған 488 млн теңгеден астам қаржы бөлінді. 2026 жылға дейін тағы 35 жаңа буын кабинеті ашылмақ.
Алдағы үш жылда өңірде қосымша 3 мектептің құрылысы басталып, 12 білім ордасы жаңғыртылады. Бұған қоса шағын қалалар мен ауылдардағы 50 мектеп кезең-кезеңімен қайта жарақтандырылмақ.
