Samsung Electronics пен SK Hynix компаниялары Оңтүстік Кореяның оңтүстік-батыс өңірінде ірі жартылай өткізгіштер өндірісі кешенін салуға шамамен 800 трлн вон, яғни 600 млрд АҚШ долларына жуық инвестиция құюды жоспарлап отырғанын жариялады. Жоба аясында Кванджу қаласы мен Чолла провинцияларында заманауи DRAM және NAND жад микросұлбаларын өндіруге маманданатын төрт өндірістік кәсіпорын бой көтереді.
Бұған қоса, елдің орталық өңірінде HBM жоғары өткізу қабілетті жад микросұлбалары мен чиптерді озық технологиялар арқылы құрастыруға арналған өндірістік база қалыптастыру үшін шамамен 81 трлн вон бөлінеді. Бұл өндіріс орындары жасанды интеллект серверлері мен жоғары өнімді графикалық процессорлардың жұмысын қамтамасыз ететін аса маңызды электрондық құрамдастарды шығаруға бағытталады. Осындай ауқымды инвестиция Оңтүстік Кореяның әлемдік жартылай өткізгіштер өндірісіндегі жетекші елдердің бірі ретіндегі орнын нығайтып, Тайвань және АҚШ-пен технологиялық бәсекені күшейтеді.
Нарық сарапшылары бұл бастама жад микросұлбаларының жаңа буынын әзірлеу қарқынын жеделдетіп, деректерді өңдеу орталықтары мен бұлтты жасанды интеллект платформаларына қажетті электрондық құрамдастар тапшылығын азайтуға ықпал етеді деп болжайды.
Қосымша материалдар мен сараптамалық шолуларды біздің Telegram арнамыздан оқуға болады.
