Ресейде адамдардың қозғалысын биометриясыз қадағалауға мүмкіндік беретін жаңа технология ұсынылды. Жүйені «Ломоносов» кластерінің резиденті әрі Мәскеу инновациялық кластерінің қатысушысы — BPA Technologies компаниясы әзірлеген. Жаңа әдістің ерекшелігі — киімге көзге көрінбейтін арнайы бояу жағылады. Оны тек бейнебақылау камералары ғана анықтай алады.
«Известия» басылымының мәліметінше, камералар бұл белгілерді тіркеп, машина көру алгоритмдері адамның қозғалысын цифрлық профильге айналдырады. Ең маңыздысы — жүйе жеке деректерді пайдаланбайды. Әр белгі тек бірегей нөмірді ғана білдіреді.
Компания өкілдерінің айтуынша, технологияны сауда саласында, көлік пен логистикада, сондай-ақ кеңсе аумақтарында қолдануға болады. Мәселен, ол тұтынушылардың әрекетін талдауға, техника жұмысын бақылауға немесе тазалық жұмыстарын автоматтандыруға септігін тигізеді. «Жүйенің әмбебаптығы мен анонимдігі оны биометрияны қолдануға болмайтын немесе қолдану қажет емес жағдайда тиімді етеді», — дейді BPA Technologies техникалық директоры Вадим Медяник.
Заңгерлердің пікірінше, жаңа жүйе биометрия туралы №572-ФЗ заңына сәйкес келмейді, өйткені ол жеке деректерді пайдаланбайды. Демек, оны енгізу үшін қызметкерлердің келісімі қажет емес және заң талаптары бұзылмайды. Жұмыс берушілер еңбек өнімділігін қадағалау жүйесін, егер ол еңбек шарты мен ішкі ережелерге сәйкес болса, өз еркімен орната алады.
Алайда бақылау жүйесінің тәуекелдері де жоқ емес. Ең алдымен, арнайы киімге жасалған белгілерді басқа адамдардың пайдалануына немесе қызметкерлер арасында алмастыруына мүмкіндік туындайды. Сондай-ақ анонимді белгілерді бұзу немесе қолдан жасау қаупі бар. Сарапшылардың айтуынша, ең үлкен қауіп — деректер базасының сыртқа шығып кетуі және қызметкерлердің жұмыс уақытынан тыс кезде де бақылануы. Бұл өз кезегінде жеке өмірге қол сұғу ретінде бағаланады.
