Интернет арқылы танысып, бірге фильм көруді ұсынатын алаяқтар қазақстандықтарды да алдаудың жаңа тәсілін меңгеріп жатыр.
Алаяқтар алдымен әлеуметтік желіде немесе танысу платформаларында “жақынырақ танысайық” деген сылтаумен жазып, арнайы сілтеме жібереді. Сілтемеге өткен адамға жалған кино көру платформасы ашылады. Одан әрі жалғасу үшін “жазылымға ақы төлеу керек” деген талап қойылады. Бұл — қаскөйлердің тұзағы.
iPhone пайдаланушылары әдетте банк картасының деректерін сұрайтын фишингтік сайтқа тап болады. Ал Android құрылғыларының иелеріне сырттай қарағанда Google Play дүкеніне ұқсас жалған платформада зиянды қосымшаны жүктеу ұсынылады.
Егер қолданушы сол қосымшаны орнатып, жеке мәліметтерін енгізсе, қаскүнемдер оның банктік деректерін қолға түсіріп, есепшотына еркін ене алады.
Сақ болыңыз! Бейтаныс адам ұсынған күмәнді сілтемелерге өтпеңіз, күмәнді қосымшаларды жүктемеңіз. Онлайн танысу мен фильм көру ұсыныстарының артында алаяқтық тұруы мүмкін екенін естен шығармаңыз.
