Генеративті жасанды интеллекттің дамуы әлемнің түкпір-түкпіріндегі ұстаздарды үй тапсырмасының мәнін де, бағалау жүйесін де түбегейлі қайта ойластыруға мәжбүрледі. Мұны MIT Technology Review жариялаған сараптамалық материал да атап өтеді.
Жасанды интеллект бір сәтте эссе жаза алатын, күрделі есептерді шешетін немесе код түзе алатын құралдарға айналғаннан бері білім беру саласында бұрын-соңды болмаған қиындық туындады. Бұрын білімді тексерудің негізгі жолы болып келген жазбаша жұмыстар мен стандартталған тестілер өз маңызын жоғалта бастады. Өйткені ЖИ-технологиялар студенттерге мұндай тапсырмаларды оңай айналып өтуге мүмкіндік береді.
Осындай жағдайға жауап ретінде педагогтер оқытудың әдістемесін түбегейлі өзгертуге кірісті. Енді назар жаттап айтуға немесе дайын ақпаратты қайталауға емес, ой сараптауды, талдауды және дерекпен жұмыс істеуді талап ететін тапсырмаларға ауысып жатыр.
Жаңа бағалау тәсілдері мына бағыттарды қамтиды:
Ауызша емтихандар мен сұхбаттар. Мұғалімдер студенттің мәтін генерациялау қабілетін емес, оның материалды қаншалықты түсінетінін анықтау үшін тікелей әңгімелесу форматына қайта орала бастады.
Жобалық және қолданбалы оқыту. Енді студенттерден жергілікті деректерге, жеке тәжірибеге сүйену немесе ЖИ технологиялары таба алмайтын ақпаратты пайдалану талап етіледі. Мәселен, сұхбат алу, зерттеу жүргізу, далалық материал жинау сияқты жұмыстар.
Нәтижеден гөрі үдерісті бағалау. Көптеген оқытушы студенттің қарапайым соңғы жұмысын емес, оның қалай түзілгенін, черновиктерін, тапсырманы жетілдіру жолдарын және ЖИ-ді қандай деңгейде дұрыс қолдана алғанын бағалайды.
Сарапшылар жасанды интеллект білімді жоймайтынын, керісінше, оны жаңғыртып, жаңа бағытқа жетелейтінін айтады. Ендігі міндет — технологиямен күресу емес, студенттерді оны тиімді пайдаланып, өз өнімділігін арттыруға және білімін тереңдетуге үйрету.
