Швейцариялық Padrone стартабы он жылдық еңбегінің нәтижесінде Padrone Primera деп аталатын ерекше гаджетті таныстырды. Сақина түрінде жасалған бұл құрылғы компьютерді тек саусақтың қозғалысы арқылы басқаруға мүмкіндік береді. Алты осьті қозғалысты анықтайтын құрылғымен, камерамен және микропроцессормен жабдықталған.
Padrone Primera құрылғысы саусақтың әр қозғалысын дәл анықтап, үстел бетін үлкен сенсорлы алаңға айналдырады. Барлық дерек құрылғының өзінде өңделетіндіктен, мәліметтердің құпиялығы сақталады. Басқару тәсілдері қарапайым және түсінікті: саусақты жылжыту – курсорды қозғалту, жеңіл түрту – сол жақ батырманы басу, ал ортаңғы саусақпен түрту – оң жақ батырманы басу қызметін орындайды.
Құрылғы Bluetooth арқылы кез келген компьютер немесе планшетке қосылады және қосымша бағдарламаларды орнатуды қажет етпейді. Бағасы – 259 еуро. Технологияны алғашқылардың бірі болып иеленгіңіз келсе, қазірден бастап тапсырыс бере аласыз..
Padrone Primera – цифрлық әлемді басқарудың жаңа деңгейі!
