WCCFTech порталы Илон Масктың жасанды интеллект үшін есептеу инфрақұрылғысының болашағы туралы пікірін жариялады. Кәсіпкердің пайымынша, Жердің энергетикалық мүмкіндіктері шектеулі болғандықтан, деректерді өңдеу орталықтарын ғарышқа көшіру қажеттігі туындайды.
Dwarkesh Podcast подкастында ол жасанды интеллектінің энергияға деген сұранысының қарқынды өсуі ғаламшардың физикалық мүмкіндіктеріне шектеу қоятындығын, сол себепті есептеу қуаттарын орналастыруда жаңа тәсілдерді қолдану қажеттігін атап көрсетті.
Масктың пікірінше, қазіргі Жердегі энергия өндіру мен тарату қарқыны жасанды интеллектінің сұранысын толық қанағаттандырмайды. АҚШ мысалында елдің жалпы энергия тұтынуы шамамен жарты тераваттаны құрайды. Жасанды интеллектті кеңінен пайдалану үшін кемінде екі есе көп қуат қажет болады. Сондықтан мұндай көлемде электр станциялары мен деректер орталықтарын Жер бетінде салу практикалық тұрғыдан мүмкін емес сценарий болып саналады.
Кәсіпкер орбиталық деректер орталықтарын құруды шешкен. Маск бұл жобаның үш жылдан үш жарым жыл ішінде экономикалық тұрғыдан тиімді болатынын болжайды. Жобаны жүзеге асыру үшін оның компанияларының инфрақұрылымы қолданылады, есептеу құралдарын жеткізуге Starship кемелері, байланыс үшін Starlink спутниктік жүйесі пайдаланылады.
Дегенмен Масктың айтуынша, энергетикалық мәселе шешілгеннен кейін жаңа қиындық пайда болады. Бұл – процессорлардың жетіспеушілігі. Аризона мен Тайваньдағы TSMC зауыттары, сондай-ақ Корея мен Техастағы Samsung фабрикалары қажет қуатты қамтамасыз ете алмайды. Осындай жағдайда жаңа зауыт салуды көздейтін амбициялық TeraFab жобасының маңызы айқын көрінеді.
Маск ғарыштағы деректер орталықтарын SpaceX компаниясының Марсқа қоныстану жоспарының логикалық жалғасы деп бағалайды. Бұл қадам компанияға жаңа коммерциялық мүмкіндіктер ашуы ықтимал. Ол атап өткендей, бұл идея мүлде жаңа емес: Starcloud стартапы NVIDIA H100 үдеткіштерін орбитаға шығарған. Дегенмен мегаватттық масштабта есептеу қуатын орналастыру кезеңі сапалық тұрғыдан мүлде жаңа, күрделі кезеңге айналады.
