Қазақстан Республикасы Ішкі істер министрлігі ел тұрғындарын жалған QR-кодтарды пайдалану арқылы жасалатын алаяқтықтың жаңа тәсілі жөнінде ескертті. Қаскөйлер қолдан жасалған QR-кодтарды қоғамдық көлік аялдамаларына, тұрғын үйлердің кіреберістеріне, жарнамалық тақталарға және адамдар көп шоғырланатын өзге де орындарға орналастырып жүр.
Осындай QR-кодты сканерлегеннен кейін пайдаланушы алаяқтар жасаған жалған интернет-ресурсқа өтуі мүмкін. Мұндай сайттар арқылы қаскөйлер азаматтардың ақшасын, банк деректемелерін және өзге де құпия мәліметтерін заңсыз иемденуге әрекет жасайды.
Бұрыннан бар хабарландырудың немесе жарнаманың үстіне жапсырылған, сапасыз әзірленген QR-кодтар күмән тудыруы тиіс. Сондай-ақ «Дереу сканерлеңіз» немесе «Сыйлық алыңыз» деген мазмұндағы үндеулер де сақтық танытуға негіз болады. Бұдан бөлек, ұйым туралы мәліметтің және байланыс деректерінің болмауы да алаяқтықтың белгісі болуы ықтимал.
Полиция қызметкерлері шығу тегі белгісіз QR-кодтарды сканерлемеуге, қандай да бір мәлімет енгізер алдында сайттың электрондық мекенжайын мұқият тексеруге кеңес береді. Сондай-ақ күмәнді интернет-ресурстарда банк картасының деректемелерін, SMS арқылы келетін растау кодтарын және құпиясөздерді ешбір жағдайда жарияламау қажет.
Жеке немесе банкке қатысты мәліметтер алаяқтардың қолына түсіп қойған болса, банк картасын дереу бұғаттап, оған қызмет көрсететін банкке шұғыл түрде хабарласу қажет.
Қосымша материалдар мен сараптамалық шолуларды біздің Telegram арнамыздан оқуға болады.
