2025 жылы Тайбэйде өткен COMPUTEX – Азиядағы ең ірі технологиялар көрмесі ғана емес, жаңа идеялардың шындыққа айналатын орны. Мұнда бүгінгі жаңалықтар ертеңгі күннің үлгісіне айналып, технология саласындағы негізгі бағыттар айқындалады. Mobilaser.kz редакциясы осы шараның жүрегінде болып, мобильді құрылғылар мен ойын әлемінің болашағын өз көзімен көріп қайтты.
Көрме алаңында көп жаңалық пен ерекше жобалар арасында ASUS компаниясының Republic of Gamers (ROG) аймағы – The ROG Lab ерекше әсер қалдырды. Бұл жай ғана компьютерлік техниканы көрсету орны емес, болашақ технологиялар мен өнертапқыштық идеялардың тоғысқан зертханасы. Мұнда жасанды интеллект пен креативтілік бірге жұмыс істеп, ойын мен гаджеттердің келешегі қалыптасуда. Біз сол ерекше атмосферадан алған әсерімізді сіздерге жеткіземіз.
Ойдан іске көшу концепциясы
ROG Lab-тың басты ұраны — «From 0 to 1», яғни «нөлден бірге». Бұл ұран зертхананың мәнін ашып береді: қарапайым идеяның шынайы өнімге айналуы. Әрбір экспонат – тек техникалық қуатты көрсету емес, ойын әлемінің және технологияның болашағы қалай жасалып жатқанын айтып беретін кішкентай әңгіме іспетінде. Мұнда геймерлер мен инженерлердің армандары қалай нақты пішінге енгенін көруге болады.
ASUS бұл лабораторияны тек бақылау алаңы ретінде емес, тәжірибе жасау орны ретінде қарастырған. Мұнда келушілер ойын ойнап, жаңа технологияларды сынап, жасанды интеллектпен байланыс жасап, тіпті өз жобаларына шабыт ала алады. Осы сәттен бастап сіз көрмеде отырғаныңызды ұмытып, болашақтың цифрлық әлеміне енгендей боласыз.
APEX Craft — лабораторияның жүрегі
ROG Lab-тың орталығында — APEX Craft. Бұл – ASUS-тың болашаққа арналған ерекше құрылғыларын жинаған идеялар инкубаторы. Солардың бірі – ROG Astral RTX 5090 видеокартасы. Оның төрт желдеткіші бар, дизайны ғылым фантастикасынан шыққандай: өткір сызықтар, мөлдір бөлшектер, ауа ағынын көзге елестететін эффекттер. Бұл техника ғана емес, өнер туындысы іспетті.
Тағы бір маңызды экспонат — AMD Ryzen AI Max+ 395 чипімен жұмыс істейтін ROG Flow Z13 гибридті планшеті. Ол шағын бола тұра, жоғары есептеу қуатын көрсетеді. Мобильділікті бағалайтын, бірақ өнімділіктен тайынғысы келмейтіндерге таптырмас шешім. Оның ішіндегі жасанды интеллект пайдаланушының жұмыс стиліне қарай құрылғыны бейімдеп отырады: графикамен жұмыс істеу, ойын немесе стриминг үшін.
Персонализацияның болашағы: аватарлар, анимация және жарық
Шығармашылық пен өзара әрекетке арналған Future Gamer аймағы ерекше есте қалады. Мұнда өзіңнің геймерлік аватарыңды жасап, жеке ID-картаңды алуға болады. Қарапайым әрі көңілді ойын, бірақ артында үлкен мән жатыр: әрбір геймердің өз тарихы бар, ASUS соны ерекше көрсетуді ұсынады. Қосымша ретінде QR-кодпен онлайн профильдің көшірмесін де алуға болады.
Illumotion — жасанды интеллект пен креативтіліктің тағы бір аймағы. Мұнда айтқан сөздерің жарық анимациясына айналады. Бұл сиқырлы өнер сияқты: мысалы, «киберпанк жаңбыры» деп айтсаңыз, көз алдыңызда сол сөздер жарық пен қозғалысқа еніп, ерекше көрініске айналады. Алгоритмдер дауыстың ырғағы мен эмоциясына сай анимацияны бейімдейді.
Mechano — ASUS-тың тағы бір таңғалдырар жобасы. Бұл толық жұмыс істейтін робот, ішіне нақты компьютер орнатылған. Ол модульді, өзгертіліп, толық функционалды. Мұнда көрсетілім тек шоу ғана емес, алдағы 5-10 жылда геймерлік құрылғылар қалай болатынының мысалы. Роботтың бөлшектерін стендте оңай ауыстыруға болады, бұл қолмен жинайтындарға үлкен қуаныш сыйлайды.
Humanlink пен CodeVerse — адам мен брендтің ортасында
Humanlink — ең “адамға жақын” аймақтардың бірі. Мұнда қуатқа емес, геймерлердің денсаулығы мен жайлылығына басымдық беріледі: дұрыс отыру, омыртқаға жүктемені бөлу, ыңғайлы орындық пен құралдарды таныстыру. ASUS мұнда техникалық көрсеткіштерден гөрі пайдаланушыларды ойлайды деген әсер қалдырады.
Ал CodeVerse — көзді аштыратын шоу. Бұл — көп экранды инсталляция, жасанды интеллект, қозғалысты тану және ROG-тың динамикалық бейнесі. Экрандарда бренд тіріліп, көрерменнің әр қозғалысына жауап береді. Бұл — әсіресе сандық дизайнды сүйетіндер үшін ерекше визуалды ләззат.
Жаңа буын техникасы
ASUS компаниясы нарыққа дайын жаңа құрамдас бөліктерін таныстырды. Ең басты жаңалықтар қатарында:
RTX 50 сериясы (BTF Edition) — бұл жинақта көрінетін кабельдер жоқ. Тазалық, қуат пен стиль үйлесімі. Қуаты 1000 ваттқа дейін жетеді, яғни ең «қоректенуді талап ететін» жобаларға да жетерлік. Бұл шешім өз құрылғысын тек өнімді әрі заманауи қылғысы келетіндерге ерекше ұнайтыны анық.
AMD X870E және B850 аналық платалары — функционалдығы жоғары модельдер, Wi-Fi 7 желісін қолдайды. Өндірушілер олардың қуат тұтынуы тиімдірек әрі жаңа буын SSD-термен жұмыс істеуі жақсартылғанын айтады.
Ryuo IV AIO салқындату жүйесі — AMOLED-дисплейі мен 3D эффектісі бар, көрмедегі ең әдемі су салқындатқыштардың бірі.
ROG XG Station 3 — сыртқы видеокарта, ол Thunderbolt 5 арқылы қосылады. Бұл шешім ноутбук қолданатын, бірақ өнімділіктен бас тартқысы келмейтін геймерлерге арналған.
ASTRAPORT — RTX 5080 негізіндегі ерекше жинақ, ғарыш тақырыбынан шабыт алған. Қарапайым корпус емес, шынайы арт-нысан. Ғалам формасындағы жарықдиодты элементтері бар стильді корпус ерекшеленгісі келетін қолданушыларға арналған.
Периферия құралдары: тышқандар, пернетақталар, коверлер және орындықтар
Жаңа ROG Harpe II Ace тышқаны небәрі 48 грамм салмақта және киберспортшылардың қатысуымен жасалған. Қолдың жалғасы іспетті дәл әрі жылдам жұмыс істейді. Оның жауап беру уақыты өте төмен, әрі арнайы бағдарламалық жасақтамамен икемдеп баптауға болады.
ROG Falcata пернетақтасы — магнитті ауыстырып қосқыштарымен жасалған, бөлек бөлінген дизайны бар және баптауға кең мүмкіндік ұсынады. Ұзақ әрі жиі жұмыс істейтін немесе ойын ойнайтындарға таптырмас шешім. Үш түрлі профильді қолдау арқылы тапсырмаларды ауыстырғанда өте ыңғайлы.
Тіпті ойын кілемшесі де жаңартылған: ROG Sheath II XXL енді салқындататын матамен жабылған. Бұл шынында да жұмыс істейді — ыстық жарықтандырылған бөлмеде ол өзін жақсы жағынан көрсетеді. Матаның қолға жағымды болуы ұзақ ойын барысында өте маңызды.
ROG Courser және Destrier Core орындықтары — жайлылығымен қатар, RGB жарықтарымен әсерлі көрінеді. Отырғанда өзіңді ғарыш кемесінің пилотының креслосында отырғандай сезінесің. Арқаға қолдау көрсетеді, қолтықтықтар реттеледі, тіпті аяқ демалатын бөлігі де бар — барлығы ең жоғары жайлылық үшін жасалған.
Мониторлар: жылдамдық пен сапа жарысы
ASUS стендінде жаңа мониторлар да көп болды.
ROG Strix Ace XG248QSG — 610 Гц жиілігі мен 0,1 мс жауап беру уақыты бар. Компания оны әлемдегі ең жылдам монитор деп атайды, әрі бұл сөзге қарсы шығатындар әзірге жоқ. Бұл құрал киберспортшылар үшін таптырмас көмекші.
Ал ROG Strix OLED XG34WCDMTG — 34 дюймдік QD-OLED технологиясымен жасалған. Google TV мен GeForce Now қолдауы бар бұл монитор мультимедиялық орталыққа айналады. Оның жоғары контрасты, бай түстері және терең қарасы ерекше әсер қалдырады.
Жүлделер мен марапаттары
COMPUTEX 2025 көрмесінде ASUS компаниясының бірнеше құрылғысы жүлделерге ие болды. Ең басты ерекшеленгендері:
ROG Harpe II Ace — экологиялық таза әрі тұрақты технологиялары үшін лайықты марапатқа ие болды.
Strix Ace XG248QSG — технологиялық көшбасшылық үшін мойындалды.
Falcata клавиатурасы мен Zephyrus G14 — инновация мен қолдану ыңғайлылығы үшін ерекше бағаланды.
Бұл марапаттар ASUS-тың геймерлік және технологиялық экожүйенің дамуына қосқан нақты үлесін көрсетеді.
ROG Lab — бұл жай ғана көрме емес, гейминктің болашағына көз жүгірту әрекеті. ASUS компаниясы тек техникалық сипаттамалар мен графикаға ғана емес, экран алдында отырған адамға да мән беретінін анық дәлелдеді. Әрбір құрылғы — роботтан бастап ойын алаңындағы кілемшеге дейін — өзінің ерекше идеясын айтады, және дәл осы “From 0 to 1” ұранының мәні осында жатыр.
ASUS болашаққа сенімді түрде алға басуда. Бұл көрме шабыт пен жігер сыйлап, сала дұрыс бағытта дамып келе жатқанына сенім ұялатады.
