Алматы облысы Қаскелең қаласында еліміздегі ең ірі робототехника фестивалдерінің бірі – Daryn FIRST байқауы өтті. Бұл шара Қазақстан Республикасының Білім және ғылым министрлігіне қарасты Республикалық ғылыми-практикалық орталық «Дарын», қоғамдық қор USTEM Foundation және SDU университетінің ұйымдастыруымен өтті. Іс-шараға Қазақстанның арнайы білім беру ұйымдарынан 1200-ден астам мектеп оқушысы қатысты.
Екі күн бойы 4-18 жас аралығындағы қатысушылар халықаралық FIRST бағдарламасының төрт санатында инженерия, бағдарламалау және робототехника саласындағы білімдері мен дағдыларын көрсетіп, өзара сайысқа түсті. Бағдарлама төрт санаты: FIRST LEGO League Discover, FIRST LEGO League Explore, FIRST LEGO League Challenge және FIRST Tech Challenge.
Фестиваль нәтижесінде 32 команда Central Asia FIRST Championship 2025-ке қатысуға квота жеңіп алды. Бұл чемпионат 2025 жылдың ақпан айында Алматыда өтеді.
Фестиваль жоғары ғылыми-техникалық деңгейде ұйымдастырылып, балалардың үлкен қызығушылығын тудырды. FIRST Tech Challenge категориясы ерекше назарға ие болып, онда қатысушылар күрделі тапсырмаларды орындай алатын роботтар жасап, динамикалық сайыстарда бақ сынасты. Жас инженерлер механика, бағдарламалау және электроника саласында терең білімдерін көрсетіп, жоғары дайындық деңгейін паш етті.
Айта кетейік, 2025 жылдың қаңтар айында осындай ауқымды сайыстар Шымкент, Ақтау және Астана қалаларында да өтеді. Ұйымдастырушылар осындай іс-шаралардың жастар арасында STEM дағдыларын дамытуға және Қазақстанда жаңа буын инженерлер мен ғалымдарды қалыптастыруға үлкен серпін беретініне сенімді.
