Тәуелсіз Cyber Temple студиясы әзірлеген DarkSwitch ойынын қараңғы фэнтези әлеміндегі стратегия және survival элементтері ұштасқан тік бағыттағы қала құрылысы симуляторы ретінде сипаттауға болады.
Steam платформасына қатысты деректерге сүйенсек, Cyber Temple геймдев студиясының баспасөз қызметі ұсынған ақпарат бойынша DarkSwitch жарыққа шыққан сәттен бастап-ақ ең танымал жаңа жобалардың біріне айналған.
Геймдев ұғымы ағылшын тіліндегі game development тіркесінен туындайды және бейнеойындарды жасау үдерісін білдіреді. Бұл үдеріс бастапқы идеядан бастап өнімді нарыққа шығару мен кейінгі қолдауға дейінгі барлық кезеңдерді қамтиды.
Студияның негізін қалаушы әрі бас директоры, қазақстандық IT-кәсіпкер Алексей Назаров. Ол ойын индустриясына келгенге дейін финтех саласында жұмыс істеп, өңірдегі алғашқы банктік емес төлем сервистерінің бірі – PayBox жобасының қалыптасуына атсалысқан.
Оның айтуынша, жобаны әзірлеу шамамен төрт жылға созылған. Алғашқы кезеңде құрамында бес-алты адамнан тұратын шағын команда жұмыс істеп, әр қатысушы бірнеше міндетті қатар атқарған. Жоба ауқымы кеңейген сайын команда да ұлғайып, құрылымдық тұрғыдан жіктеле бастаған. Нәтижесінде 2D және 3D графикаға жауапты арт бағыты, визуалды эффектілер мен техникалық арт, бағдарламалау және сапаны бақылау, геймдизайн және нарратив секілді дербес бағыттар қалыптасты. Сонымен қатар нақты міндеттерді шешу үшін сыртқы сарапшылар да тартылған. Осылайша команда тұрақты емес, өніммен бірге дамып отырған тірі жүйеге айналған.
«Бұл үдеріс теориялық модельге емес, нақты тәжірибеге сүйенген қалыптасу ретінде сипатталады. Команда әр кезеңде күрделене түскен нақты міндеттерге жауап ретінде жасақталды», – деп түсіндірді Алексей Назаров.
Жобаның қаржыландырылуы толықтай негізін қалаушының жеке қаражаты есебінен жүзеге асқан. Яғни сыртқы инвесторлар немесе баспагерлік қолдау тартылмаған. Жалпы инвестиция көлемі шамамен бес миллион АҚШ долларын құраған.
Алексей Назаровтың пайымынша, DarkSwitch бастапқыда жай ғана кезекті ойын ретінде емес, халықаралық деңгейде бәсекеге қабілетті өнім жасау талпынысы ретінде жоспарланған. Команда сыртқы қолдаусыз-ақ өз жанрында жетекші жоба қалыптастыруды мақсат еткен. Бұл ретте негізгі ұстаным – геймдев саласында серпіліс жасау үшін ішкі кәсіби әлеует пен команда мүмкіндіктеріне сүйену.
Оның айтуынша, жобаның басты сынағы – алғашқы тұжырымдаманы қалыптастырудан бастап толыққанды жарияланымға дейінгі барлық циклді өз күшімен еңсеру болған. Яғни әлемдік деңгейдегі жобалармен бәсекелесе алатын өнімді толық дербес әзірлеу міндеті алға қойылған.
Жобаның идеялық негізі кездейсоқ қалыптаспаған. Ол автордың жеке тәжірибесіне сүйенеді. Алексей Назаров жасөспірім кезінен бастап түрлі стратегия жанрындағы ойындарды ойнап, классикалық RTS жобаларынан бастап күрделі жүйелік ойындарға дейінгі кең ауқымды қамтыған.
Бастапқы ниет – өзі қызығып ойнайтын өнім жасау болған. Команда әртүрлі ойындар мен жанрлардан шабыт алғанымен, нақты бір жобаны көшіруге ұмтылмаған. Негізгі бағыт стратегияны тек есеп пен оңтайландыру жүйесі ретінде емес, басқару үдерісін қысым, тәуекел және салдар ұғымдарымен байланыстыра отырып көрсетуге құрылған.
Назаровтың айтуынша, DarkSwitch әлемі біртіндеп қалыптасқан. Оның негізінде қараңғы фэнтези эстетикасы, вудпанк элементтері, жарық пен қараңғылықтың тек физикалық емес, символдық қарсы тұруы жатыр.
Аталған идеялық негіз ойынның визуалды стилін, атмосферасын және негізгі механикаларын айқындаушы факторға айналған.
Жобаның жетекші әзірлеушісі үшін ең күрделі әрі стратегиялық маңызы жоғары шешімдердің бірі – әзірлеу мерзімін қосымша алты айға ұзарту болған. Бұл шешім өнім сапасын арттыру мақсатында қабылданған.
Бастапқы жоспар бойынша ойын 2025 жылдың күзіне қарай шығуы тиіс еді. Алайда белгілі бір кезеңде жоба сапасы команда қойған ішкі стандарттарға толық сәйкес келмейтіні анықталған. Осыған байланысты релиз кейінге шегерілген.
Алексей Назаров бұл шешімді бизнес тұрғысынан күрделі, алайда өнім сапасы тұрғысынан жалғыз дұрыс қадам ретінде бағалайды.
Релизге дейін-ақ DarkSwitch Steam платформасында 230 мыңнан астам пайдаланушының қалаулар тізіміне енгізілген.
Маркетинг стратегиясы бастапқы кезеңнен-ақ дербес бағыт ретінде қарастырылған. Команда нарықты жан-жақты талдап, халықаралық тәжірибесі бар сарапшыларды тартқан. Соның негізінде жобаны ілгерілетудің негізгі кезеңдері мен назар аударту нүктелері айқындалған.
Әзірлеушілер аудиториямен белсенді байланыс орнатып, кері байланысты жүйелі түрде жинап отырған. Сонымен қатар ойыншыларға жобамен ерте танысу мүмкіндігін беру үшін демо-нұсқа ұсынылған. Бұл тәсіл тек қалаулар санын арттырумен шектелмей, жоба төңірегінде қызығушылығы жоғары аудитория қалыптастыруға мүмкіндік берген.
Команда деректеріне сүйенсек, қалаулар саны бойынша DarkSwitch релизге дейінгі кезеңде Steam платформасындағы Қазақстаннан шыққан ең көрнекті жобалардың біріне айналған.
Жобаның табысты болуына музыкалық сүйемелдеудің де ықпалы зор болған. Команда үшін ойын атмосферасын тек визуалды емес, эмоциялық деңгейде жеткізе алатын композитор табу маңызды міндеттердің бірі болған.
Осы мақсатта жобаға жапон композиторы Акира Ямаока тартылған. Ол Konami компаниясымен байланысты бірқатар ойындардың музыкасын жазған, сондай-ақ дыбыс режиссері, гитарист әрі продюсер ретінде танымал.
Алексей Назаровтың пікірінше, Акира Ямаоканың музыкасы ойынға жай ғана фон ретінде қосылмайды. Ол DarkSwitch әлемін терең сезінуге мүмкіндік беретін маңызды көркемдік элементке айналған. Музыкалық қатар белгісіздік қорқынысын жеткізіп, кернеуді күшейтіп, ойын кеңістігін қабылдаудың жаңа деңгейін қалыптастырады.
Сонымен қатар әзірлеушілер жоба аясында қол жеткізілген нәтижемен шектелуді көздемейді.
Алексей Назаровтың айтуынша, DarkSwitch – аяқталған өнім емес, ауқымды баяндаудың бастапқы бөлігі ғана. Команда ойын әлемін бірден толық ашып көрсетуді мақсат етпей, оны кезең-кезеңімен дамыту стратегиясын таңдаған. Қазіргі кезеңде негізгі міндет – ойыншылардың реакциясын зерделеп, жоба әлемінің болашақтағы даму бағытын айқындау.
Материалда Батырхан Тоғайбаев ұсынған деректер, Cyber Temple студиясының баспасөз қызметі дайындаған материалдар, сондай-ақ Алексей Назаров-тың Instagram парақшасындағы және ашық дереккөздердегі фотоматериалдар пайдаланылды.
Қосымша материалдар мен сараптамалық мақалаларды https://t.me/mobilaser арнасынан оқуға болады
