Массачусетс технологиялық институтының (MIT) ғалымдары ChatGPT сияқты жасанды интеллект құралдарын жиі пайдаланатын адамдарда ойлау белсенділігінің төмендеуі мүмкін екенін анықтады. Зерттеу аясында интеллектуалдық тапсырмаларды орындау кезінде мидың жұмысы бақыланып, мазасыздануға себеп болатын тұжырымдар жасалды.
Экспериментке 54 адам, соның ішінде әскери қызметкерлер қатысып, үш топқа бөлінді. Бірінші топ – ChatGPT көмегімен эссе жазғандар, екіншісі – ақпаратты Google арқылы іздегендер, ал үшіншісі ешқандай цифрлық құралсыз, өз бетінше тапсырманы орындағандар. Миға түсетін салмақ пен белсенділік деңгейі электроэнцефалография (ЭЭГ) арқылы өлшенді.
Нәтижесінде ешқандай көмекке жүгінбеген қатысушылардың ми белсенділігі ең жоғары деңгейде болды. Ал ChatGPT пайдаланғандарда бұл көрсеткіш айтарлықтай төмен болып шықты. Тіпті кейін олар жазған мәтіннің мазмұнын еске түсіруде қиындыққа тап болып, тапсырманы жасанды интеллектсіз орындаған кезде де зейіні мен қызығушылығы төмен болды.
Зерттеу барысында ЖИ қолданбай жазылған мәтіндер жоғары бағаланып, өз бетімен жұмыс істеген қатысушылар жауапкершілік пен жеке қатысудың жоғары деңгейін сезінгенін атап өтті.
Ғалымдар генеративті ЖИ құралдарын жиі пайдалану есте сақтау және шешім қабылдау процестеріне әсер етуі мүмкін екенін ескертеді. Бұл білім беру саласында мұндай технологиялардың орнын қайта қарауды қажет етеді және олардың когнитивтік қабілеттерге ұзақ мерзімді ықпалы әлі де терең зерттеуді талап етеді.
Дереккөз: Techno-Science.net
