Британиялық iSIZE стартабы ағынмен таралатын бейнеконтентті интеллектуалды түрде оңтайландыруға арналған бұлтты платформаны әзірледі. Жүйе терең оқытуға негізделген алгоритмдер арқылы бейне сапасын адамның физиологиялық ерекшеліктерін ескере отырып жақсартады әрі сонымен қатар битрейтке қойылатын талапты айтарлықтай төмендетеді. Нәтижесінде үлкен көлемдегі деректерді тарату үдерісі жеңілдеп, серверлік инфрақұрылымға түсетін жүктеме едәуір азаяды, бұл олардың өткізу қабілетін іс жүзінде екі есеге дейін арттыруға мүмкіндік береді.
Жуырда iSIZE компаниясы алгоритмдерді жетілдіру және платформаның функционалдық мүмкіндіктерін кеңейту мақсатында бірнеше инвестордан, соның ішінде Octopus Ventures жетекшілік еткен қорлар тобынан, 6,3 миллион АҚШ доллары көлемінде қаржы тартты.
Соңғы жылдары стримингтік бейне сервистерінің қарқынды дамуы байқалады. COVID-19 пандемиясы кезінде қашықтан жұмыс істеу мен онлайн ойын-сауық түрлерінің кең таралуы Netflix, YouTube және Amazon Prime секілді платформаларға деген сұранысты күрт арттырды. Interdigital сарапшыларының бағалауынша, 2022 жылға қарай жаһандық интернет-трафиктің шамамен 82 пайызы бейнеағын үлесіне тиесілі болады. Ал консалтингтік зерттеулер бұл саланың қазіргі таңда жыл сайынғы ғаламдық көмірқышқыл газы шығарындыларының 1 пайыздан астамын құрап отырғанын және ұзақ мерзімді перспективада бұл көрсеткіштің тұрақты өсетінін айғақтайды.
iSIZE компаниясының негізгі өнімі саналатын BitSave алгоритмі бейнеағынды оңтайландыру барысында адамның көру жүйесіне тән қабылдау шектерін басшылыққа алады. Платформа AVC, HEVC және AV1 секілді кең таралған кодтау стандарттарымен үйлесімді жұмыс істейді әрі стримингтік сервистердің ішкі архитектурасына өзгеріс енгізуді талап етпейді. Мәселен, BitSave жүйесін Netflix және өзге де танымал бейнехостингтерге жылдам біріктіруге болады. Бұл ретте сервистердің қалыпты жұмысы сақталып, деректерді өңдеу орталықтарына түсетін жүктеме шамамен екі есеге азаяды, ал бейне сапасы кем дегенде бұрынғы деңгейде қалып, кей жағдайда 40 пайыздан астам жақсарады.
iSIZE компаниясының бас директоры Сержио Грсе TechCrunch басылымына берген сұхбатында, платформа битрейтті үнемдей отырып, контентті пайдаланушы құрылғысында бұрынғыдай немесе одан да жоғары сапада көрсетуге мүмкіндік беретінін атап өтті. Оның айтуынша, бұл технология музыка саласында MP3 форматының енгізілуімен болған өзгерістерге ұқсас серпіліс жасап, бейнеиндустриядағы деректерді тарату тәсілін түбегейлі жаңғырта алады.
Қаржыландырудың А сериясындағы раундына Octopus Ventures-тен бөлек TD Veen қоры мен Twitter директорлар кеңесінің төрағасы, сондай-ақ Google компаниясының бұрынғы қаржы директоры Патрик Пичетт қатысты. Қазіргі таңда iSIZE тартқан инвестицияның жалпы көлемі 8,2 миллион АҚШ долларына жетті. Компания бұл қаражатты платформаны одан әрі дамытуға, алгоритмдердің дәлдігін арттыруға және жаңа клиенттермен жұмыс аясын кеңейтуге бағыттамақ.
Хайтек+
