11 желтоқсаннан бастап Beeline кейбір тарифтердің бағасын көтеріп, мазмұнын өзгертті. Ал 13 желтоқсаннан бастап Activ тарифтері 10%-ға қымбаттады. Тарифтер бағасы тұрақты түрде өсіп жатқанымен, интернетке қосылу жылдамдығы нашар күйінде қалып отыр. Digitalbusiness.kz редакциясы үш ірі мобильді оператордан байланыс сапасын қалай жақсартуды жоспарлап отырғандарын және азаматтарға тұрақты интернет ұсыну бойынша қандай шаралар қабылдайтындарын сұрап қайтты.
Қазақстанда мобильді интернет сапасын операторлар қалай жақсарта алады?
Beeline: «Байланыс операторлары интернет-трафик тұтынуымен бірдей жылдамдықта жаңа инфрақұрылым салуы қажет. Өкінішке қарай, қажетті рәсімдер жарты жылға дейін уақыт алады, сондықтан оң өзгерістер баяу жүруде. Дегенмен, операторлар байланыс сапасын жақсарту үшін жыл сайын базалық станциялар орнатуға, оптикалық-талшықты кабель тартуға, CDN (Контент жеткізу желісі) орнатуға, сондай-ақ VoLTE, VoWifi, Massive MIMO сияқты жаңа технологияларды енгізуге ондаған миллион теңге инвестициялауда», – деп мәлімдеді.
Kcell: «Байланыс сапасын жақсарту үшін оператор базалық станцияның техникалық жағдайлары бұзылған жағдайда (электр қуатының үзілуі, трансмиссияның ажыратылуы және т.б.) оны жедел қайта баптай алады. Базалық станцияның жүктемесі артқан кезде, трафик тұтыну өскенде, желіні жаңғырту және ұялы байланыс желісін салу бойынша жоспарлы жұмыстар қажет», – деп хабарлады.
Tele2/Altel: «2024 жылы Tele2/Altel компаниясы Қазақстанның Цифрлық даму министрлігімен бірлесіп, жиіліктерді қайта бөлу жобасын бастады. Біз 2000-жылдары іске қосылған ескі 3G технологиясын өшіріп, барлық абоненттерді 4G және 5G-ге ауыстырып жатырмыз. Бұл үдерісті елдің көптеген ірі қалаларында аяқтадық, келесі жылы Қазақстанның барлық өңірлерінде жалғастыруды жоспарлап отырмыз. Бұл ауысу пайдаланушыларға сапалы қызмет ұсынуға мүмкіндік береді.
5G қолдайтын құрылғылардың таралуы әлі де біркелкі емес. Сондықтан жиіліктерді қайта бөлу – стратегиялық қажеттілік. Tele2/Altel желіні дамытуға белсенді инвестиция салып, 5G-ді елдің ең шалғай аймақтарында да қолжетімді етуге ұмтылуда. Компанияның құрылыс бригадалары бұл желіні мүмкіндігінше тезірек іске қосу үшін тәулік бойы жұмыс істейді», – деп мәлімдеді.
Байланыс сапасын жақсартуға абоненттер қалай ықпал ете алады?
Beeline: «Пайдаланушылар байланыс мәселелерін түсініп, белсенді азаматтық ұстаным танытса, операторларға көмектесе алады. Мысалы, радиофобтарға базалық станцияларды орнату мәселелерінде соңғы шешімді қабылдауға жол бермеу. Абоненттер жақындарына антеннасыз байланыстың болмайтынын түсіндіріп, білімдерін бөлісе алады. Көпшілік жабдыққа қарсы болғанда, операторлар дәрменсіз.
Көбінесе телекоммуникациялық жабдықтың жұмысына абоненттер сатып алатын репитерлер (байланыс күшейткіштері, ретрансляторлар) кері әсер етеді. Мұндай құрылғы бір адамға көмектескенімен, басқаларға кедергі келтіреді», – деп түсіндірді.
Kcell: «Әр жағдай жеке қарастырылады. Егер сізді байланыс сапасы қанағаттандырмаса, алдымен ұялы байланыс операторына өтініш беру қажет. Мүмкін, техникалық параметрлерді қайта баптау көмектеседі (бұл дереу орындалуы мүмкін).
Кейбір жағдайларда базалық станция орнату қажет. Егер тұрғындар радиофобия салдарынан келісім беруден бас тартса, мүдделі тұлғалар көршілерімен сөйлесіп, базалық станция орнатуға келісім жинауда ұялы байланыс операторларына көмектесе алады.
Бизнес немесе басқа да мүдделі тараптар операторларға инфрақұрылым мен базалық станцияларды орнатуға арналған антенна-мачталық құрылымдарды салуда, сондай-ақ ғимараттардың шатырларында орын ұсынуда көмек көрсете алады», – деп ұсынды.
Мәтінін жазған: Елизавета Филоненко
Сурет авторы: Катерина Малама
