Қазақстанның Бас прокуратурасы азаматтарды әлеуметтік желілерде заң талаптарын сақтауға және ақпараттық мәдениетті ұстануға шақырды. Қадағалаушы орган өкілдерінің айтуынша, цифрлық кеңістікте тексерілмеген мәліметтердің жедел таралуы қоғам үшін елеулі қауіпке айналып отыр.
Ведомствоның мәліметінше, соңғы уақытта жұртшылық назарын аударуға ұмтылған кейбір қолданушылар деректің анықтығына көз жеткізбестен ақпарат таратады. Мұндай әрекеттердің салдары ауыр болуы мүмкін. Себебі негізсіз мәліметтер қоғамдық тұрақтылыққа әсер етіп, азаматтардың іскерлік әрі жеке беделіне нұқсан келтіреді. Сонымен қатар мемлекеттік институттардың қалыпты қызметіне кері ықпал етуі ықтимал.
Бас прокуратура интернет кеңістігінде толық жасырындық болмайтынын ескертеді. Қазіргі технологиялар ақпараттың қайдан тарағанын анықтауға мүмкіндік береді. Заңға қайшы жарияланымдардың авторлары қолданыстағы заңнамаға сәйкес жауапкершілікке тартылады.
Осыған байланысты мамандар әрбір пікір мен жазбаның салдары бар екенін естен шығармауға кеңес береді. Жала жабу, ар-намысқа тию немесе әдейі жалған ақпарат тарату заңмен қудаланатын әрекеттер қатарына жатады.
Қадағалау органы өкілдері құқық қорғау жүйесінің басты мақсаты тек жазалау емес, құқықбұзушылықтың алдын алу екенін де атап өтті.
