Қазақстанда екінші атом электр станциясын салу жобасы қарастырылып жатыр. Атом энергетикасы агенттігінің мәліметінше, аталған бастама елдің энергетикалық жүйесін әртараптандыруға бағытталған стратегиялық қадамдардың бірі ретінде бағаланып отыр.
Жоспар бойынша, екінші атом электр станциясы да алғашқы нысан секілді Алматы облысының Жамбыл ауданында орналастырылады. Бұл шешім тиісті қаулымен бекітілген. Алайда нақты құрылыс алаңы әзірге айқындалмаған. Егер бірінші станция Үлкен ауылында бой көтерсе, екінші станция үшін қолайлы орын қосымша зерттеулер нәтижесінде таңдалады.
Сонымен қатар жоба аясында реактор технологиясын және оны жеткізуші компанияны анықтау міндеті тұр. Осы мәселелер нақтыланғаннан кейін станция құрылысының кезеңдері белгіленіп, іске асыру мерзімдері бекітіледі. Халықаралық тәжірибе көрсеткендей, мұндай ауқымды энергетикалық нысандарды салу, әдетте, он жылдан он екі жылға дейін уақытты талап етеді.
Агенттік өкілдері сондай-ақ шағын қуатты реакторлар негізіндегі станцияларды енгізу мүмкіндігіне де тоқталды. Бұл бағыт Қазақстанның атом энергетикасын 2050 жылға дейін дамыту стратегиясында қарастырылған. Алайда мұндай жобаларды жүзеге асыру үшін ең алдымен олардың экономикалық тиімділігі жан-жақты саралануы тиіс.
Мемлекеттік органның мәліметінше, шағын модульдік реакторларды елдің түрлі өңірлерінде орналастыруға болады. Бұл шешім энергияға деген сұранысқа, қажетті ресурстардың, соның ішінде салқындату үшін су көздерінің қолжетімділігіне, сондай-ақ инфрақұрылымның даму деңгейіне байланысты қабылданады.
Аталған технология әсіресе оқшауланған энергетикалық жүйелерде немесе шалғай елді мекендерді электр қуатымен қамтамасыз етуде тиімді болуы мүмкін. Дегенмен бұл мәселе әлі де кешенді зерттеуді қажет етеді.
Агенттік өкілдерінің айтуынша, атом электр станциялары электр энергиясын тұрақты өндіруді қамтамасыз етіп қана қоймай, жоғары технологиялық жұмыс орындарының көбеюіне, инфрақұрылымның дамуына және сабақтас салалардың жандануына ықпал етеді.
Жобаны жүзеге асыру елдің энергетикалық қауіпсіздігін нығайтып қана қоймай, жаңа өнеркәсіптік тізбектердің қалыптасуына, өңірлік экономиканың күшеюіне және ұзақ мерзімді технологиялық дамудың берік негізін қалауға мүмкіндік береді.
