2025 жылғы 13 тамыздан бастап Қазақстанда SpaceX компаниясының Starlink спутниктік интернеті ресми түрде іске қосылды. Бұл ақпаратты Цифрлық даму, инновациялар және аэроғарыш өнеркәсібі министрлігі хабарлады. Ел Орталық Азияда бұл сервисті сынақ режимінен шығарып, ресми пайдалануға берген алғашқы мемлекетке айналды.
Енді Starlink желісіне тек білім беру мекемелері ғана емес, кез келген азамат қосыла алады. Starlink желісі төмен орбиталық спутниктер арқылы жұмыс істейді, сондықтан шалғайдағы ауылдар мен қашық аудандарда да тұрақты, жылдам байланысқа қол жеткізуге болады.
Министрлік пен SpaceX арасындағы ресми келісімшарт маусым айында жасалған. Құжат ұлттық заңнаманы сақтау міндетін бекітіп, құрал-жабдықты бөлшек саудада сатуға жол ашты.
Қазіргі таңда Starlink әлемнің 70-тен астам елінде қызмет көрсетеді, пайдаланушылар саны 3 миллионнан асты. Орбитада шамамен 6 мың спутник жұмыс істеп тұр, ал олардың саны күн санап артып келеді.
Қазақстанда бұл технология әсіресе интернет қолжетімі шектеулі, шалғай аймақтарда аса қажет. Билік спутниктік интернеттің іске қосылуы цифрлық теңсіздікті азайтып, білім беру мен бизнестегі мүмкіндіктерді кеңейтеді деп үміттенеді.
