Қазақстанда Сыбайлас жемқорлыққа қарсы іс-қимыл агенттігінің ұсынысымен тегін дәрі-дәрмектерді беру жүйесі реформалануда. Агенттік хабарлағандай, QR-кодтарды қолданатын пилоттық жоба Абай облысында енгізіліп, алғашқы оң нәтижелерін көрсетуде.
2024 жылы дәрі-дәрмекпен қамтамасыз ету бойынша біршама мәселелер анықталды. «СК-Фармация» ЖШС тарапынан жеткізілімдер кешігіп, тегін дәрі-дәрмектердің жетіспеушілігі байқалды. Нәтижесінде науқастар дәрілерді өз қаражатына сатып алуға мәжбүр болды. Бұл жағдайды жасыру мақсатымен медициналық мекемелер жалған рецептілер жазып, пациенттерге дәрі-дәрмектердің берілуі қамтамасыз етілген деп көрсетілді.
Енді дәрі-дәрмектерді «Әлеуметтік әмиян» мобильді қосымшасы арқылы QR-код арқылы алуға болады. Жоба әзірге Абай облысындағы емханаларда сынақтан өтіп жатыр, бірақ оның жақын арада ел көлемінде енгізілуі жоспарланып отыр. Жаңа жүйе жалған рецептілердің санын азайтуға және процесті ашық етуге мүмкіндік берді.
2024 жылы Абай облысында пациенттер саны өткен жылмен салыстырғанда 14%-ға артқанымен, жазылған рецептілер саны 25 мыңға жуық азайды. Бұл өзгеріс заманауи цифрлық шешімдердің енгізілуімен түсіндіріледі, олар бюджет қаражатын үнемдеуге және ұрлық қаупін минимизациялауға көмектеседі, деп атап өтті Сыбайлас жемқорлыққа қарсы іс-қимыл агенттігі өкілдері.
Александр Мельников
