Қазақстанда азаматтарды мобильді және интернет алаяқтықтан қорғау, SIM-карталарды заңсыз пайдалану мен жаппай қоңыраулар мен хабарламаларды таратуды болдырмау мақсатында кешенді шаралар қабылдануда.
Маңызды бағыттардың бірі – ұялы байланыс операторлары мен Ұлттық банктің Антифрод орталығы арасындағы үйлестіру. Бұл жүйе арқылы алаяқтық схемаларда қолданылатын нөмірлерді жылдам анықтап, блоктауға мүмкіндік жасалады. Күмәнді қоңыраулар немесе SMS хабарламалары, оның ішінде SIM-бокстар арқылы жіберілген хабарламалар анықталған жағдайда оператор абонент туралы ақпаратты антифрод-орталыққа жібереді және тексеру жүргізеді. Егер алаяқтық белгілері расталса, нөмір дереу блокталып, байланыс қызметі уақытша тоқтатылады.
Сонымен қатар, абоненттік нөмірлерді бір адамға тіркеу тәртібі енгізілді. Жеке және отбасылық пайдалану үшін бір адамға ең көп он SIM-карта тіркелуі мүмкін. Көп нөмір алу тек нақты қажеттілік пен пайдаланылатын құрылғылар көрсетілген жағдайда рұқсат етіледі. Бұл жаппай нөмір тіркеу арқылы жасалатын алаяқтық әрекеттердің алдын алады.
Абоненттерді сәйкестендіру де күшейтілуде. SIM-картаны алу тек биометриялық сәйкестендіруден өткеннен кейін мүмкін болады. Кәсіпорындар мен ұйымдарда қызметтік мақсатта берілетін SIM-карталар үшін де бұл талап сақталады. Биометриялық сәйкестендіру анонимді нөмір қолдануды болдырмайды және абонент жауапкершілігін арттырады.
Сондай-ақ, биометрия енгізілуі SIM-карталарды заңсыз саудадан қорғауға мүмкіндік береді. Қызметтер нөмір қай жерден алынғанына қарамастан, тек абоненттің жеке басы расталғаннан кейін беріледі.
Жалпы, қабылданып жатқан шаралар байланыс жүйесін қауіпсіз әрі ашық етуге, алаяқтық тәуекелдерін азайтуға және азаматтарды қаржылық әрі цифрлық алаяқтықтан қорғауға бағытталған.
