Қазақстанда Президент тапсырмалары аясында кең көлемде цифрлық жаңғыртуды жүзеге асыру мақсатында Министрлік жасанды интеллект және цифрлық даму саласындағы жаңа платформаны – Alem.Cloud-ты таныстырды. Бұл жүйе ұлттық суперкомпьютер кластерінің ресурстарын пайдалану үшін өтініш беруге мүмкіндік береді. Alem.Cloud әлемдегі ең қуатты жүйелердің TOP-500 рейтингінде 86-шы орында тұр және өңірдегі ең ірі есептеу орталығы екенін дәлелдейді.
Alem.Cloud ресурстары енді заңды тұлғаларға, оның ішінде мемлекеттік мекемелерге, ғылыми және білім беру ұйымдарына, стартаптарға, жеке компанияларға және Astana Hub резиденттеріне қолжетімді. Министрлік ресурстарды бөлу ережелерін әзірледі, онда жобалардың стратегиялық маңыздылығы мен жасанды интеллект саласындағы ұлттық даму міндеттері ескерілген.
Суперкомпьютерді қолданудың басым бағыттарына мемлекеттік басқару, білім беру мен денсаулық сақтау, ауыл шаруашылығы мен су қамтамасыз ету, мұнай-газ саласы, тау-кен металлургия кешені мен энергетика, геология және барлау, транспорт пен логистика, өнеркәсіп және құрылыс, робототехника мен дрондар, киберқауіпсіздік, қаржы технологиялары кіреді.
Платформа арқылы өтініш беру үшін пайдаланушы https://alem-cloud.nitec.kz/ сайтына кіріп, қажетті ресурстарды – GPU, CPU, RAM және SSD сақтау орнын таңдап, қолдану мерзімін көрсетіп, жобасын сипаттайды. Платформада калькулятор қарастырылған, ол жобаға қажет конфигурацияны есептеуге және жалпы құнын анықтауға мүмкіндік береді. Әр өтініш заңды тұлғаның электрондық цифрлық қолтаңбасымен расталады.
Ұлттық суперкомпьютер тұрақты және үздіксіз жұмыс істейтін есептеу ресурстарын қамтамасыз етеді. Қызметтер тәулік бойы қолжетімді, деректер резервтік көшірмелермен қорғалған, ал SLA талаптары жоғары қолжетімділік пен жұмыс тұрақтылығын кепілдейді. Бұл компаниялар мен ұйымдарға жобаларын сенімді жоспарлауға және іске асыруға мүмкіндік береді.
Сілтеме: TOP-500 рейтингіндегі 86-шы орын Қазақстанның әлемдік деңгейде қуатты ғылыми-техникалық инфрақұрылымға ие екенін және өздік AI модельдерін дамыту әлеуетінің жоғары екенін көрсетеді. Бұл елге іргелі зерттеулер жүргізу, сондай-ақ цифрлық қызметтер мен технологияларды экспортқа шығару мүмкіндіктерін ашады.
Жасанды интеллект және цифрлық даму минисрлігінің баспасөз орталығы
Әлемдік деңгейдегі есептеу қуаты
