2025 жылғы маусым айындағы Speedtest Global Index деректеріне сәйкес, Қазақстан мобильді интернет жылдамдығы жөнінен әлемдік рейтингте үш сатыға көтеріліп, 103 елдің ішінде 47-орынға жайғасты. Елдегі орташа мобильді интернет жылдамдығы 87,27 Мбит/с-қа жеткен. Бұл туралы Finprom.kz сарапшылары мәлімдеді, деп жазады «Сапалы Қазақстан» порталы.
«Қазақстан ТМД кеңістігінде ешбір елге дес бермей, айқын басымдықпен көш бастап тұр», – дейді сарапшылар.
Мобильді интернеттің орташа жылдамдығы бойынша Қазақстан мына елдерден озып отыр:
Әзербайжаннан – 20% жоғары (55-орын, 72,52 Мбит/с);
Армениядан – 48% (67-орын, 59,03 Мбит/с);
Өзбекстаннан – 56% (71-орын, 55,78 Мбит/с);
Молдовадан – 61% (72-орын, 54,25 Мбит/с);
Қырғызстаннан – 61% (73-орын, 54,07 Мбит/с);
Украинадан – 63% (74-орын, 53,65 Мбит/с);
Ресейден – 2,3 есе (88-орын, 37,61 Мбит/с);
Беларусьтан – 4,9 есе (102-орын, 17,97 Мбит/с). Беларусьтің жағдайы рейтингтің соңына жақын.
Сарапшылар Қазақстан тек ТМД-ны ғана емес, сонымен қатар интернет инфрақұрылымы дамыған көптеген елдерді де басып озғанын атап өтті. Олардың қатарында – Гонконг, Венгрия, Испания, Германия, Ұлыбритания, Түркия, Ирландия және тіпті Жапония бар.
Мұндай серпінді өсім соңғы жылдардағы жүйелі инфрақұрылымдық дамудың және жаңа технологияларды ендірудің нәтижесі. 2025 жылдың өзінде-ақ интернет жылдамдығы 6,7%-ға артқан.
Сарапшылар мұны елімізде 5G желісінің қарқынды енгізілуімен байланыстырады. Ookla деректеріне қарағанда, Қазақстанда 5G жылдамдығы 4G-мен салыстырғанда 10 еседен аса жоғары. Қазіргі таңда бұл технологияны Tele2/Altel мен Kcell байланыс операторлары дамытып жатыр.
5G тек жалпы рейтингке ғана емес, Қазақстан қалаларының да позицияларына оң әсерін тигізіп отыр. Астана мобильді интернет жылдамдығы бойынша әлемнің 43-орнында (152,95 Мбит/с), ал Алматы 63-орында (131,96 Мбит/с) орналасқан.
«Айтпақшы, баршаға мәлім Токио бұл тізімде тек 94-орында ғана. Ондағы жылдамдық – небәрі 72,5 Мбит/с», – деп түйіндеді сарапшылар.
