Қытай ғылым академиясының академигі, Цинхуа университетінің профессоры Оуян Мингао жаңа энергия көздеріне негізделген көлік құралдарына арналған аккумулятор жүйелері мен күштік қондырғыларды зерттеу жұмыстарын басқарып келеді. Оның соңғы болжамына сәйкес, қатты күйлі батареялардың нарықтағы үлесі 1 пайызға жетуі үшін шамамен 5–10 жыл қажет.
Ғалымның айтуынша, алдағы екі жылда мұндай батареялармен жабдықталған автокөліктердің кеңінен таралуын күту орынсыз. Себебі технология әлі толық сынақтан өтпеген және қосымша жетілдіруді талап етеді.
Жыл соңына қарай және келесі жылы жекелеген көліктерде қатты күйлі аккумуляторларды сынақтан өткізу кезеңі басталмақ. Дегенмен бұл технология кеңінен насихатталып жатқанымен, оны өндіру барлық компаниялар үшін қолжетімді емес. Сондықтан қауіпсіздік пен сенімділік тұрғысынан алғанда, жақын екі жыл ішінде мұндай батареялармен жабдықталған көліктерді нарыққа жаппай шығару тиімсіз деп бағаланады.
Оуян Мингао тұтынушыларға қазіргі электромобильдердің де сапасы жоғары екенін атап өтті. Оның пікірінше, қатты күйлі батареяларды дамыту үдерісі бірізді әрі кезең-кезеңімен жүзеге асуы тиіс. Бұл бағытта асығыс шешім қабылдау технологияның сапасына кері әсер етуі мүмкін.
IXBT
