Танымал «Аркейн» сериалының шоураннері Кристиан Линке League of Legends әлемі бойынша үш жаңа тележоба жасалып жатқанын растады. Линкенің айтуынша, осы жобалардың бірінде анимациялық жұмыстар бір жылдан бері жүргізілуде.
Жаңа сериалдарда әртүрлі аймақтар мен олардың тұрғындарының тарихы баяндалады. Бұл аймақтар: Ноксус, Иония және Демасия.
Ноксус – жаулап алу мен қақтығыстарға негізделген күшті және зұлым аймақ.
Иония – “Бірінші Жерлер” деп аталатын үлкен архипелагте орналасқан бірнеше одақтас провинциядан тұрады.
Демасия – орталықтағы Ұлы Қала мен жергілікті аристократиясы бар қуатты патшалық.
«Ойынның ішінде 160-тан астам чемпион бар, олардың тарихын білу мен үшін өте қызық», – дейді Линке. Ол Ноксус туралы сериалда Мэлдің тарихын жалғастыру мүмкіндігі туралы айтып, Свейннің тарихына да тоқталды. Айта кетерлігі, осы кейіпкерге сілтеме екінші маусымның соңында жасалған.
Жаңа жобалардың премьерасы қашан болатыны әзірге белгісіз. Алайда, алғашқы «Аркейн» маусымына алты жыл, екінші маусымға үш жыл жұмсалғанын ескерсек, жаңа жобалардың шығуы біраз уақыт алуы мүмкін.
