Forbes басылымы Amazon компаниясының құқық қорғау органдарын өз жасанды интеллект (ЖИ) және бақылау жүйелерінің пайдаланушылары ретінде тарту стратегиясын зерттеген тергеуін жариялады. Зерттеу нәтижесі бойынша, компания тек Amazon Web Services (AWS) платформасын полиция үшін құрал ретінде ұсынумен шектелмей, осы саладағы басқа компаниялармен ынтымақтасып, оларға бұлтты инфрақұрылымды пайдалануды ұсынатыны анықталды.
Amazon серіктестері полиция департаменттеріне әртүрлі қызметтер ұсынады. Оларға Flock Safety компаниясының көліктерді бақылау және нөмірлерді оқу жүйелері, ZeroEyes компаниясының қаруды анықтау технологиялары, C3 AI және Revir Technologies компанияларының қылмыспен күрес орталықтары үшін нақты уақыттағы қосымшалары, сондай-ақ Abel Police және Mark43 компанияларының полиция хаттамаларын жасауға арналған ЖИ жүйелері кіреді.
ACLU саяси талдау бөлімінің аға сарапшысы Джей Стэнли Amazon бақылау технологияларын авторитарлық бағытта ілгерілетіп жатқаны алаңдататынын атап өтті. Оның пікірінше, Amazon құқық қорғау органдарында ЖИ технологияларының делдал қызметін атқаратындығы көпшілікке белгісіз болып келген.
Forbes бағалауы бойынша полиция технологиялары нарығы 11 миллиард АҚШ долларын құрайды. Amazon құқық қорғау органдарымен жұмыс істейтін командасының жіберген электрондық хаттары компанияның бұл нарықтағы үлесін арттыруға айтарлықтай күш салып отырғанын көрсетеді.
Маман пікірлеріне сүйенсек, компанияның агрессивті стратегиясы деректердің құпиялылығы мен полиция қызметкерлерінің бұл құралдарды дұрыс қолдануы мәселелеріне қатысты алаңдаушылық тудырады. Жасанды интеллект кейде қателіктерге ұрынуы мүмкін, оны дұрыс қолданбау ықтималдығы жоғары. Осы саладағы реттеу әлі толыққанды жолға қойылмаған, ал АҚШ-тағы кейбір құқық қорғау органдары технологияларды пайдалану жөніндегі заңдарды орындамай отыр.
