Қазақстанның Қаржылық мониторинг агенттігі (АФМ) жасанды интеллект пен 3D-модельдеудің заманауи технологияларына негізделген жаңа цифрлық жобаны іске қосты. Енді агенттіктің ресми өкілінің цифрлық аватары халықпен байланыс орнатып, маңызды ақпараттарды бөлісіп отырады.
Агенттік өкілдерінің айтуынша, бұл бастама – халықпен ашық әрі жедел байланыс орнатудың, қаржы саласындағы заң бұзушылықтардың алдын алу бағытындағы түсіндіру жұмыстарын автоматтандырудың бір жолы.
Цифрлық көмекші АФМ-нің әлеуметтік желілердегі парақшаларында тұрақты түрде шығып тұрады. Ол азаматтарға қаржылық қауіпсіздік, алаяқтықтан қорғану жолдары, заңбұзушылықтардың алдын алу бойынша маңызды әрі түсінікті ақпарат береді.
Агенттік бұл бастама арқылы халықпен қарым-қатынасты нығайтып, қаржы саласындағы сауаттылықты арттыруды көздеп отыр.
